Vendet anëtare të Bashkimit Evropian kanë rënë dakord të mbyllin kufijtë e BE-së për të gjitha udhëtimet jo thelbësore për 30 ditë, me qëllim parandalimin të përhapjes së koronavirusit.
Propozimi, për të vendosur një ndalim të hyrjes në zonën e Shengenit të BE-së u bë nga Komisioni Europian dhe do të zbatohet nga 26 shtete.
Vendimi u bë i ditur nga Presidenti i Këshillit Evropian, Charles Michel, gjatë një videokonference.
“Ne kemi miratuar udhëzimet e propozuara nga Komisioni për Menaxhimin e Kufijve. Për të kufizuar më tej përhapjen e virusit, ne kemi rënë dakord të forcojmë kufijtë e jashtëm duke zbatuar një kufizim të koordinuar të përkohshëm të hyrjeve jo emergjente për 30 ditë”, u shpreh presidenti i Këshillit Evropian.
Masat kufizuese zbatohen në të gjithë territorin e Bashkimit Evropian, përfshirë zonën Shengen. Ato nuk vlejnë për qytetarët e BE-së, banorët e përhershëm të vendeve të BE-së, diplomatët dhe stafin mjekësor, si dhe ekspertët që ndihmojnë në ndalimin e koronavirusit.
Ndërkohë mbyllja e kufijve do të bëhet vetëm për njerëzit dhe jo për mallrat dhe kjo shënon herën e parë që BE merr një vendim të tillë./Opinion.al
