Kreu i Grupit Parlamentar të Partisë Socialiste, Taulant Balla, ka thënë se ditën e nesërme do të fillojë procesi për zgjedhjen e presidentit.
Balla tha se nesër do të ketë një takim me grupin parlamentar socialist dhe të mërkurën fton kryetarët e grupeve të opozitës në një takim për të diskutuar mbi këtë çështje.
“Duam që të informojmë publikun mbi disa hapa të rëndësishme që grupi i Partisë Socialiste do ndërmarrë përgjatë këtij procesi deri në datën 29 prill kur procesi merr fillimin kushtetues. Nesër në këtë sallë ne do të marrim propozimet e para me emra konkretë për kandidatë për presidentë nga anëtarët e grupit të PS. Në një zarf të tillë, çdo deputet i grupit të PS përmes një formulari propozues do të ketë mundësinë të propozojë jo më shumë se 3 kandidatë ose kandidate. Mund të jenë qofshin të treja zonja, apo zotërinj. Kjo është një pjesë e procesit të konsultimit. Duam të nxisim edhe publikun që të bëhet pjesë e këtij procesi. Në adresën zyrtare të grupit tonë parlamentar ne do të nxisnim publikun që të sjellin propozimet e tyre dhe mendoj që ky është një standard i ri për t’u ndarë një herë e përgjithmonë nga kulisat e vjetra të konsultimit. Edhe populli nuk mund të përjashtohet nga e drejta për të sjellë propozime. Konsultimet me grupet parlamentare të opozitës. Do të ftojmë grupet parlamentare të opozitës dhe duke qenë se koha është e shkurtër, do t’u propozojmë një takim të tre kryetarëve të grupeve, së pari zotit Alibeaj si kryetar i grupit të PD, zonjës Mesila Doda dhe zotin Fatmir Mediu në një takim paraprak këtu në zyrat e Kuvendit për të vendosur parimet kryesore të një dialogu konstruktiv mes 4 grupeve parlamentare”,-tha Balla.
