Konfirmohet Balluku, ikën Spiropali! Si i ndryshoi Rama drejtuesit e qarqeve

Partia Socialiste ka nisur punën për zgjedhjet vendore 2027 dhe në mbledhjen e Asamblesë u bënë ndryshime të drejtuesve politikë në 6 qarqe. Kryesocialsiti Edi Rama ka larguar Elisa Spiropalin, Eduart Shalsin, Benet Becin dhe Emirjana Sakon, ndërsa ka konfirmuar drejtuesit në 6 qarqe: Fier, Vlorë, Korçë, Gjirokastër, Berat dhe Elbasan. Dy ministrave të rinj, të paprovuar me votë, iu beson drejtimin e Shkodrës dhe Lezhës.

“Ne jemi Partia Socialiste e Shqipërisë dhe ne duhet ta ngremë Tiranën më lart sesa mesi i atij klasifikimi. Me çdo kusht”. Mes këtyre kritikave, kryesocialsiti Edi Rama ka larguar nga drejtimi i qarkut më të madh, Tirana, Elisa Spiropalin dhe ia ka besuar atë kreut të grupit të PS, Taulant Balla, i cili do të vijojë të mbajë edhe postin e koordinatorit të PS për diasporën, por edhe drejtimin e njësisë numër 5 bashkë me Erion Braçen dhe Fatmir Xhafajn.

Pasi u shkarkua si ministre e Jashtme, pozitat e Spiropalit dobësohen edhe brenda partisë. Ajo nuk do të udhëheqë më asnjë qark, veçse do jetë drejtuese e njësisë numër 13 në Tiranë bashkë me Anila Denajn. Ogerta Manastirliu mbetet drejtuese politike e PS në Bashkinë Tiranë. Ndonëse me fitore të thella, socialistët janë të bindur se nuk kanë bërë punë sa duhet për Tiranën.

“Tirana është një qark i fituar, por jo në maksimumin tonë”, tha sekretari i përgjithshëm i PS-së, Blendi Klosi, ndërsa Fierin e vlerësoi si qarkun më të fortë dhe me fitoren më të thellë. Në këtë qark, Rama konfirmoi Belinda Ballukun, të cilën e shkarkoi si numrin 2 të qeverisë, por nuk lejoi arrestimin e saj nga SPAK. Përveç Ballukut, konfirmohen Bledi Çuçi në Vlorë, Niko Peleshi në Korçë, Mirela Kumbaro në Gjirokastër, Arbian Mazniku në Elbasan dhe Ervin Demo në Berat.

Dy ndryshime që bien në sy janë përfshirja e dy ministrave të rinj në drejtimin e qarkut Shkodër, që i besohet ministrit të Energjisë, Enea Karakaçi dhe Lezha ministrit të Mbrojtjes Ermal Nufi. Ky i fundit zëvendëson Ulsi Manjën, me një rezultat të fortë në Lezhë në zgjedhjet e 2025-ës, ku për 71 vota nuk e përmbysi dot rezultatin 4-3 për demokratët. Ulsi Manja do të rikthehet në Dibër, ku do të zëvendësojë Blendi Klosin.

Deputeti Klosi do të marrë drejtimin e qarkut të Durrësit, nga i cili largohet kryebashkiakja Emirjana Sako. Ndërsa në Kukës ku ikën Eduard Shalsi, Rama provon një tjetër figurë të re në PS, deputetin e Tiranës Erion Malaj, i cili u përfshi në listën e sigurt të socialistëve në zgjedhjet parlamentare të 2025-ës.

Taulant Balla ruajti edhe postin e koordinatorit të PS për diasporën, ndërsa në Asamble u miratua edhe një pr.vendim për organizimin e partisë jashtë kufijve, ku PS synon të shtrijë strukturat e saj. Socialistët do të nisin një fushatë të gjerë regjistrimi të anëtarësisë në shtetet, ku jetojnë pjesa më e madhe e shqiptarëve, Itali, SHBA, Gjermani, Kanada, dhe Mbretëri e Bashkuar. Afati për regjistrimin e emigrantëve do të nisë më 30 mars dhe do të zgjasë deri më në 30 shtator, ndërsa regjistrimi është bërë më herët vetëm në Greqi.

“Zgjedhjet e reja vendore nuk kanë pjesëmarrje të diasporës, por ama zgjedhjet vendore janë momenti për t’i kthyer diasporës vëmendjen që meriton”, tha Rama.

Blendi Klosi la objektiv anëtarësimin e 4 anëtarëve të rinj (2 femra dhe 2 meshkuj) për çdo organizatë socialiste, ndërsa kryesocialisti Rama e quajti të pafalshme faktin që në PS vetëm 34% e anëtarësisë përbëhet nga gratë dhe kërkoi që këtë nivel ta çojnë në 50%. Kryetarëve të Bashkive iu vendosi ultimatum se nuk do t’i lejojë të kandidojnë në vendoret e 2027-ës, pa dhjetë kontrata të firmosura në kuadrin e Paketës së Maleve dhe pa tre ndërmarrje të përbashkëta të miratuara.

Ndryshimet në Qarqe

Qarku Tiranë – Taulant Balla- ikën Elisa Spiropali

Bashkia Tiranë – Ogerta Manastirliu

Qarku Durrës – Blendi Klosi- ikën Emirjana Sako

Qarku Lezhë – Ermal Nufi- zëvendëson Ulsi Manjën

Qarku Shkodër – Enea Karakaçi- ikën Benet Beci

Qarku Dibër – Ulsi Manja – zëvendëson Blendi Klosin

Qarku Kukës – Erjon Malaj– ikën Eduard Shalsi

Qarku Elbasan – Arbian Mazniku- Konfirmohet

Qarku Berat – Ervin Demo- Konfirmohet

Qarku Fier – Belinda Balluku– Konfirmohet

Qarku Vlorë– Bledi Çuçi- Konfirmohet