Kryetari i Kuvendit, Gramoz Ruci mblodhi sot kryetarët e grupeve, pak orë para nisjes së seancës plenare. Në përfundim të mbledhjes, Spaho tha se kriminaliteti i shtuar në vend dhe çështja e teatrit janë dy shqetësimit e opozitës.
Edmond Spaho: “Ngrita shqetësimin për kriminalitetin në vend, kjo gjendje është rezultat i një qeverisje të kriminalizuar. Solla në vëmendje dhe sulmin ndaj gazetares Klodiana Lala, gjë që është pika kulmore e asaj politikë konstante në denigrimin dhe luftën e ashpër ndaj përfaqësuesve të medias që kanë qenë kundër tij. Solla në vëmendje rastin e lidhjes së Taulant Ballës me një të dënuar, solla rastin e Ergys Çurbjes, siç është bërë e ditur nga media ai komunikon me një bandë shumë e rrezikshme, siç është banda e Shullazit. Këto raste janë nën juridiksionin e ligjit të dekriminalizimit. Për sa i takon kalendarit, ngrita çështjen e Teatrin, qeveria duhet të sjellë dekretin në Kuvend dhe ta rrëzojë ligjin. Por duket se qeveria nuk e ka këtë mendim. Me veprimet e tyre do ta çojnë vendin ku paqëndrueshmëria politike do të jetë tipari kryesor mes qeverisë dhe opozitës”, deklaroi Spaho pas mbledhjes.
