Prokuroria e Posaçme kundër Krimit të Organizuar dhe Korrupsionit ka thirrur ish-ministrin e Financave Shkëlqim Canin dëshmitar për koncesionin e sterilizimit.
Sikurse duket në videon e mëposhtëme, Cani shfaqet teksa futet në ambientet e SPAK, aty ku siç raportohet do të pyetet në lidhje me këtë koncesion që ka çuar disa persona në pranga.
Cani ka shërbyer si ministër Financash nga viti 2013 deri në vitin 2016, që përkon me nisjen e hetimeve për koncesionin me vlerë 100 mln Euro të sterilizimit të mjeteve kirurgjikale. Cani do të japë sqarime lidhur me një shkresë të firmosur në vitin 2015.
Kujtojmë se SPAK ka lëshuar 8 urdhra, me masa të ndryshme sigurie, dy me masën ‘arrest me burg’ për ish-zëvendësministrin e Shëndetësisë, Klodian Rjepaj dhe biznesmenin Ilir Rrapajn. Ndërkohë për dy zyrtarë të tjerë u caktua masa ‘arrest shtëpie’ si dhe për 4 të tjerë u caktua masa ‘detyrim paraqitje’.
Rrapaj kishte fituar një koncesion 10-vjeçar, në kohën kur ministria e Shëndetësisë, drejtohej nga miku i tij, Ilir Beqja.
Po ashtu ish-zëvendëskryeministri Rjepaj ka qenë kryetar i këtij komisioni të dhënies së koncesionit, që dyshohet se janë shkelur procedurat.
Kjo çështje është prej 3 vitesh nën hetim nga SPAK, dhe pikërisht për këtë rast është marrë në pyetje disa herë edhe ish-ministri i Shëndetësisë, Ilir Beqaj.
