Kryeministri, Edi Rama ka përshëndetur vendimin e Komunitetit Mysliman të Shqipërisë për të marrë disa masa të nevojshme për të mbrojtur qytetarët nga një infektim i mundshëm nga COVID-19.
Kreu i qeverisë e ka cilësuar këtë një vendim të duhur në kohën e duhur, dhe ka shprehur respekt për komunitetin duke shtuar se ky ishte mesazhi më kuptimplotë që ky komunitet mund t’i jepte popullit.
“Respekt, respekt, respekt, për komunitetin mysliman që vendosi anullimin e faljes së namazit dhe të çdo tubimi nëpër xhami”, shkran mes të tjerash, Rama.
Kujtojmë se duke vlerësuar situatën e paprecedentë të krijuar nga koronavirusi, KMSH vendosi masat e mëposhtme:
1- Ngarkohen të gjithë myftinjtë dhe stafi i tyre të ndërmarrë fushata sensibilizuese për publikun dhe të inkurajojnë të gjithë besimtarët, kryesisht moshën e tretë dhe personat me sëmundje kronike që t’i kryejnë ritualet fetare në banesat e tyre.
2- Anullimi i tubimeve masive si ligjërata, kurse në xhami, aktivitete të ndryshme dhe sipas rrezikshmërisë në zonën tuaj të anullohet edhe falja e namazit të xhumasë.
3- Pesë kohët e namazit sugjerohet të falen në mënyrë jo të organizuar, ndërkohë ezani të thirret në mënyrë të rregullt në të gjitha xhamitë.
4- Zbatimi me rigorozitet i të gjitha sugjerimeve dhe këshillave të nxjerra nga autoritetet përkatëse në vendin tonë si dhe nga Organizata Botërore e Shëndetësisë./Opinion.al
