Koronavirusi vijon të përhapet në shumë vende të botës, ndërsa në Shqipëri ditën e sotme u shënua viktima e parë.
Ndërkohë, në kuadër të maskave të marra për parandalimin e përhapjes së koronavirusit Hungaria ka pezulluar të gjitha fluturimet nga Italia, Koreja Jugore, Irani dhe Kina.
Ndalimi i fluturimeve nga katër shtetet e prekur nga ky virus do të fillojë së zbatuari menjëherë, ka thënë Gergely Gulyas, shef i stafit të kryeministrit hungarez, Viktor Orban.
Universitetet hungareze po ashtu do të mbyllen, pa harruar edhe anulimin e të gjitha organizimeve me 100 pjesëmarrës në ambiente të mbyllura dhe 500 në ambiente të hapura.
Gulyas ka thënë se këto ndalesa do të mbesin në fuqi deri në njoftimin e radhës, duke shtuar se qeveria pret që ndikimi i epidemisë të vazhdojë për muaj dhe jo javë.
Në mesin e masave të reja përfshihet edhe ndalimi i udhëtimit me autobusë ose trena në vendet e lartpërmendura. Deri më tani në Hungari janë infektuar 13 persona me koronavirusin e ri, mirëpo asnjëri prej tyre nuk ka vdekur.
Kina – vendi ku ka shpërthyer virusi për herë të parë -ka raportuar për mbi 80,000 persona të infektuar dhe 3,136 të vdekur. Megjithatë, të martën ky shtet ka regjistruar numrin më të ulët të të infektuarve, vetëm 19.
Ndërkohë numri i rasteve të prekura me këtë virus në Evropë është duke u rritur vazhdimisht, pasi rreth 10,000 persona janë infektuar vetëm në Itali.
