Kreu i Drejtorisë së Përgjithshme të Shërbimeve të Transportit Rrugor Blendi Gonxhja ka njoftuar kompensimin e Taksës Vjetore të Mjeteve të Përdorura për vitin 2020 në vlerën 100% për një kategori të caktuar automjetesh. Përmes një publikimi në rrjetet sociale, Gonxhja bën me dije se paketa e solidaritetit kap vlerën e 1.4 milion euro, ndërsa saktëson se përfituesit janë 7,204 mjete të kategorisë autobus (mbi 8+1):.
“Një shembull solidariteti nga DPSHTRR-MIE për sektorin e transportit rrugor të pasagjerëve ku një ent publik me vetëfinancim, nisur nga rezultatet e mira për 2019-ën ofron, nga të ardhurat e veta të akumuluara, të mbulojë 100% taksën vjetore të mjeteve të përdorura (TVMP), për gjithë vitin 2020, për 7,204 mjete! Nga kjo paketë solidare e DPSHTRR-së në vlerën 170,194,500 lekë (ose 1,4 milionë euro) përfitojnë 7,204 mjete të kategorisë autobus (mbi 8+1):
Transport qytetës,
Transport rrethqytetës,
Transport ndërqytetës,
Shërbime të rastit (turistik brenda e jashtë vendit),
Ndërkombëtar të rregullt,
Transport për personele,
Transport për llogari të subjekteve brenda e jashtë vendit.
Subjekteve përfituese, që kanë kryer pagesën e TVMP-së për vitin 2020, kompensimi do t’u bëhet sipas radhës së datës së pagesës së ardhshme, duke i zbritur detyrimin përkatës të paguar tashmë!”, ka shkruar Gonxhja, duke bërë të qartë se nga këto subjekte nuk përfitojnë ata që janë debitorë në detyrime të mëparshme.
“Nuk përfitojnë nga ky vendim të gjitha subjektet që rezultojnë debitore dhe nuk kanë kryer pagesën e TMVP-së për vitet paraardhëse. Përjashtimisht, këto subjekte përfitojnë vetëm nëse paguajnë detyrimet e prapambetura brenda 30 (tridhjetë) ditëve nga hyrja në fuqi e këtij vendimi, pra 5 Gusht 2020!”, njofton kreu i DPSHTRR./Opinon.al
