Kryetari i Grupit Parlamentar, Gazment Bardhi ka reaguar pas deklaratës së kryeministrit Edi Rama, i cili theksoi se ka përfunduar koha kur Presidenti i vendit drejtonte “revolucione” kundër qeverisë, ndërsa vlerësoi veprimet e kreut të shteti, Bajram Begaj.
Në reagimin e tij, Bardhi thotë se tashmë Rama nuk e fsheh më që ka marrë dhe rolin e presidentit të vendit, teksa thekson se tashmë kreu i qeverisë po tregon se çfarë mund të bëjë dhe çfarë jo kreu i shtetit.
Kreu i grupit demokrat thotë se dekretimi i ndryshimeve ligjore për komisionet hetimore nga Begaj, është bërë me urdhër të kryeministrit.
Reagimi i Gazment Bardhit
E kuptojmë plotësisht që Edi Rama nuk e fsheh më rolin e tij, edhe si president i Republikës! Ai na tregon çfarë mund dhe çfarë nuk mund të bëjë presidenti i Republikës. Avokatia ndaj aktit antikushtetues, të njëanshëm dhe të turpshëm të presidentit të Republikës, provon atë që opozita thotë: Edi Rama është urdhëruesi i shpalljes së ligjit sot, me justifikimin absurd të shkruar në arsyetimin e Presidentit që Edi Rama nuk dëshiron të rishohë ligjin. Edhe që Edi Rama nuk dëshiron të rishikohet ligji, e kuptojmë, sepse është ai që ka bllokuar kontrollin parlamentar ndaj ekzekutivit. Si mund të jetë dakord Edi Rama që të kontrollohet ndërhyrja e paligjshme në sistemin TIMS, për të fshirë lidhjet e vllait të tij, Olsi Rama, me trafikun e drogës në dosjen “Xibraka”; si mund të jetë dakord Edi Rama të kontrollohet që, në kontratat koncesionare të shëndetesisë, miliona euro shkojnë në xhepat e Ilir Beqajt dhe jo për shërbime shëndetësore për qytetarët shqiptarë; si mund të jetë dakord Edi Rama të kontrollohet zbatimi i ligjit për investimet strategjike, me të cilin ka shpallur investitor vetëm miq e shokë të tij, përfshirë trafikantë droge e urdhërues vrasjesh?! Koha kur Shqipëria pretendonte të ishte si gjithë Europa, po perëndon gjatë qeverisjes së Edi Ramës. Tani jemi në garë nëse do t’u bashkohemi standardeve të Rusisë apo Koresë së Veriut. Opozita po bën betejë që kjo të mos ndodhë dhe jemi të vendosur për t’u përballur, që të mos lejojmë ta zëvendësojmë demokracinë me autokracinë.
