Ish-aleati i Ramës, deputeti i perjashtuar Koço Kokëdhima që sot drejton partinë “Zgjidhja” ka rreshtuar 100 të zeza për kryeministrin. Gjithë zemërimi vjen pasi Shqipëria pranoi të presë emigrantët nga Eritrea që nuk po i pranon Italia.
Ja reagimi i plotë i Kokëdhimës
Në intervistën dhënë gazetës italiane “Corriere della Sera” kryeministri ynë zbulon se askush nuk ia kërkoi Shqipërisë që të marrë 20 emigrantë nga Eritrea, por ai u vetëofrua. Nuk ka patur asnjë kërkesë nga qeveria italiane, e cila prej vitesh përpiqet ta ndajë peshën e madhe të emigrantëve që hyjnë në Itali, me vendet e tjera të BE-së. Asnjë qeveri e bllokut nuk iu përgjigj, përveç Irlandës, që pranoi 20 emigrantë, po aq sa Shqipëria. Europa është e përmbytur nga emigrantët dhe disa vende të tjera nuk duan të marrin as edhe një të vetëm.
Qeveria është e vendosur që të përparojë me planin e saj për ta kthyer Shqipërinë në një megakamp emigrantësh nga Afrika dhe Lindja e Mesme. Asaj i mbeti në dorë plani ogurzi për të pranuar mbi 600 mijë refugjatë nga Lindja e Mesme që nuk pranohen nga vendet e BE-së, falë qëndrimit kundër të qeverisë franceze. Por ëndrra e kryeministrit tonë për të dalë si shpëtimtari i krizës së emigrantëve që ka pllakosur BE-në, duke rrënuar përfundimisht Shqipërinë, vazhdon. Ai, përmes ministrit të jashtëm, jo vetëm që thotë se pranon 20 emigrantë, por si megalloman që është, deklaron se vendi ka kapacitete për më tepër.
ZGJIDHJA i denoncon me vendosmëri sjellje të tilla armiqësore ndaj popullit shqiptar.
Kjo qeveri e papërgjegjshme, kërkon të shitet si proeuropiane, kur në të vërtetë është armike e vlerave demokratike që bashkon demokracitë perëndimore. Shqipëria nuk ka asnjë kapacitet për të mbajtur qoftë edhe një emigrant të vetëm, sepse po përzë përditë bijtë e saj më të mirë, duke u bërë kombi me më shumë emigrantë në botë për frymë, vendi që ka më shumë azilkërkues se vendet që janë në luftë, vendi më i varfër, më i pasigurtë dhe më i goditur nga krimi. Me këto qeveri të korruptuara dhe të papërgjegjshme ne rrezikojmë të ardhmen dhe ekzistencën tonë si komb. Emigrantët nga Eritrea apo të tjerë që kërkon të pranojë kjo qeveri nuk kanë se ku të fusin kokën në Shqipëri dhe do të kenë si pikësynim të vetëm largimin me çdo mjet drejt Europës Perëndimore, siç po ndodh aktualisht me ata emigrantë që kalojnë tranzit nëpër Shqipëri.
ZGJIDHJA u bën thirrje vendeve të BE-së që të mos gënjehen me shashkat e rrezikshme që hedh kryeministri ynë.
Ai është autokrat, i korruptuar, arrogant, inferior, mizor, i pashpirt, shtypës dhe dështak, humbës, tutkun dhe analfabet politik, dinak, i lig, armik i eger i republikës, demokracisë dhe lirisë, shef i kartelit të drogës shqiptare, njësh me krimin dhe kriminelët, i kapur dhe në shërbim të interesave të kundërta me interesat e kombit dhe të shtetit tonë, kryeoligark dhe pjesë e oligarkisë së urryer të Shqipërisë, bashkëpërgjegjës kryesor për varfërinë, papunësinë dhe eksodin ekstrem të rinisë shqiptare.
Europa është përgjegjëse për heshtjen ndaj bëmave të kësaj qeverie dhe të qeverive paraardhëse.
Shqipëria shpreson të nisë negociatat me BE-në në qershorin e ardhshëm dhe në mungesë të plotësimit të kushteve, kërkon ta blejë mbështetjen politike me lloj-lloj marifetesh të ulëta dhe antishqiptare.
