Është prezantuar sot zyrtarisht drafti i parë i Kodit të Ri Penal, një dokument që shënon një moment të rëndësishëm në reformimin e sistemit penal shqiptar. Një grup pune i përbërë nga ekspertë të fushës, nën drejtimin e Arben Rakipit, drejtor i Shkollës së Magjistraturës kanë hartuar draftin.
Konkretisht gjatë fjalës së tij në prezantimin e draftit Rakipi theksoi se një nga propozimet më të guximshme që është përfshirë në draft është mundësia e lirimit me kusht për të dënuarit me burgim të përjetshëm.
“Përfundimisht diskutimi i gjatë u mbyll me propozimin që po ne mund ta aplikojmë lirimin para kohe me kusht për dënimin me burgim të përjetshëm. Është një propozim shumë i guximshëm, debati ka qenë i fortë. Sepse këtu mpleksen shumë gjëra, viktima, procesi i edukimit, paqja sociale, rendi publik, shkalla e kriminalitetit në vend.”– tha Rakipi.
Një vendim të debatueshëm dhe kompleks e ka cilësuar ai pasi prek jo vetëm aspektin penal, por edhe atë social, etik dhe psikologjik.
Gjithashtu Rakipi shtoi se propozimi është fryt i bindjes personale dhe profesionale se njerëzit mund të ndryshojnë, nëse vendosen në kushte që favorizojnë rehabilitimin dhe edukimin e tyre.
“Nisur nga besimi që edhe personalisht kam që njerëzit ndryshojnë nëse kushtet në të cilat vendosen janë të efektshme. Kjo është një eksperiencë e përditshme që ndodh gjithandej. Ndaj e propozuam këtë zgjidhje, por se çfarë fati do ketë kjo zgjidhje apo dekriminalizime të tjera, është për t’u parë. Mund të krijojë debate dhe është mirë të krijojë debate. Unë pres që diskutimi i përgjegjshëm të zhvillohet dhe në fund të dalim me një zgjidhje të përbashkët.”-tha Rakipi.
Drafti i Kodit të Ri Penal pritet të kalojë në një fazë të gjerë diskutimesh publike dhe institucionale, dhe duhet të marrë dritën jeshile nga Brukseli përpara se të miratohet.
