Prezantohet drafti i Kodit të Ri Penal, përpara aktorëve kryesorë të sistemit të drejtësisë dhe partnerëve ndërkombëtarë. Gjatë fjalës së tij ministri i Drejtësisë Ulsi Manja ka renditur arsyet pse një kod i ri penal është i nevojshëm, duke nënvizuar faktin që ndryshimet shoqërore kanë nxjerrë në pah forma të reja kriminaliteti që kërkojnë përgjigje të qarta.
Sipas ministrit, kodi aktual nuk i përgjigjet me sfidave të kohës dhe paraqet probleme për zbatimin e tij nga gjykatat dhe organet e akuzave.
Drafti do të hidhet për konsultim publik, ndërsa ministri theksoi se ai nuk është përfundimtar.
“Zhvillimet kanë sjellë forma të reja kriminaliteti që kërkojnë përgjigje të qarta dhe adekuate penale, dhe reforma e re e drejtësisë ka riformuar sistemin duke bërë të nevojshëm rishikimin e normës materiale penale.
Kodi aktual nuk i përgjigjet me sfidave të kohës dhe paraqet probleme për zbatimin e tij nga gjykatësit dhe prokurorët”, tha Manja.
Ministri bëri një ftesë të drejtpërdrejtë për përfshirje në këtë proces.
“Dua të ftoj profesionistët e ligjit, gjyqtarë, prokurorë, avokatë, institucionet e drejtësisë, Avokatin e Popullit dhe një ftesë të veçantë për opozitën parlamentare, opozitën e vendit tim, që të kontribuojnë me ekspertizë dhe pjesëmarrje aktive në tryezat e konsultimit.”
Manja theksoi edhe rëndësinë e këtij drafti, në procesin e integrimit të vendit në Bashkimin Evropian.
“Në BE shkon Shqipëria, jo vetëm një forcë politike. Mund të ndërtojmë një Kod Penal modern, efektiv dhe në përputhje të plotë me standardet e Bashkimit Evropian.”
Siç deklaroi edhe Manja, me përfundimin e konsultimit dhe marrjes së certifikimit në Bruksel, drafti i ri do të kalojë për miratim në Kuvend, me shumicë të cilësuar.
