KLSH ka kryer auditim në Drejtorinë Vendore të Agjencisë Shtetërore të Kadastrës në Sarandë dhe në Drejtorinë e Rrugeve të Rajonit Verior në Shkodër.
Njoftohet se në Sarandë, KLSH ka evidentuar problematika në menaxhimin e aseteve dhe pasurisë publike, si dhe përgjegjësitë përkatëse nga tre ish-zyrtarë. Sipas auditimit, ka pasur një vëmendje të posaçme të çështjeve që lidhen me trojet e shitura nga Bashkia e Sarandës dhe kalimi i tyre në pronësi të personave privatë.
Nga ana tjetër edhe KLSH ka evidentuar shkelje nga katër funksionarë të Drejtorisë së Rrugëve për Rajonin Verior në Shkodër. Shkeljet tek këta funksionarë janë gjetur tek procedurat për prokurimin publik.
Në llogari të këtij dëmi bëhet me dije se KLSH i është drejtuar Prokurorisë ku kërkon ndjekje penale për veprën të “shpërdorimit të detyrës” parashikuar në nenin 248 të Kodit Penal për 4 funksionarë dhe 3 ish-zyrtarë në institucionet në të cilat kryeu auditimin. Identiteti i tyre nuk bëhet i ditur, por mësohet se në Kadastrën e Sarandës janë gjetur problematika si pasojë e regjistrimeve të pronave të kryera në mungesë të titujve të pronësisë, të cila kanë sjellë pasojën e përfitimit për persona të tjerë duke dëmtuar interesat e ligjshme të shtetit.
NJOFTIMI NGA KLSH
Në kuadër të angazhimit për të luftuar pa kompromis veprimet abuzive dhe ato të mashtrimit financiar me pronën publike, me synim përmirësimin e qeverisjes publike, Kontrolli i Lartë i Shtetit gjatë ushtrimit të punës audituese ka konstatuar shkelje të cilat përbëjnë vepër penale në dy institucione:
1.KLSH ushtroi auditimin tematik në Drejtorinë Vendore të Agjencisë Shtetërore të Kadastrës dhe në Bashkinë Sarandë, duke i kushtuar vëmendje të posaçme çështjeve që lidhen me trojet e shitura nga Bashkia Sarandë dhe kalimi i tyre në pronësi të personave privatë.
Rezultatet e këtij auditimi kanë evidentuar problematikat e menaxhimit të aseteve dhe pasurisë publike, si dhe përgjegjësitë përkatëse nga tre ish-zyrtarët, veprimtaria e të cilëve ka rezultuar me mospërputhje dhe devijime ligjore, si pasojë e regjistrimeve të pronave të kryera në mungesë të titujve të pronësisë, të cila kanë sjellë pasojën e përfitimit për persona të tjerë duke dëmtuar interesat e ligjshme të shtetit.
2.Kontrolli i Lartë i Shtetit ka evidentuar shkelje edhe nga katër funksionarë të Drejtorisë së Rrugëve Rajoni Verior Shkodër, për të cilët ka rezultuar se kanë kryer veprime të kundraligjshme gjatë ushtrimit të detyrës.
Në përfundim të procesit të auditimit janë konstatuar një sërë shkeljesh mbi zbatimin e ligjshmërisë në prokurimin e fondeve publike dhe sipërmarrjet e mirëmbajtjes së segmenteve rrugore në juridiksionin që mbulon Drejtoria e Rrugëve e Rajonit Verior Shkodër.
Sa më sipër, për veprimet që kanë sjellë pasojën e përfitimit për persona të tjerë, duke dëmtuar interesat e ligjshme të shtetit nga tre funksionarë të DVASHK Sarandë si dhe për zbatimin e procedurave të prokurimit në kundërshtim me Ligjin Nr. 9643 Dt. 20.11.2006 “Për Prokurimin Publik”, i ndryshuar, për katër funksionarë të Drejtorisë së Rrugëve të Rajonit Verior Shkodër, KLSH i është drejtuar Prokurorisë ku kërkon ndjekje për veprën penale të “shpërdorimit të detyrës” parashikuar në nenin 248 të Kodit Penal./Opinion.al
