Ministri i Turizmit dhe Mjedisit, Blendi Klosi u ka lënë detyra dhe gjithashtu afate, kryetarëve të Bashkive të zonave bregdetare për të patur një sezon të mbarë turistik.
Disa nga pikat kryesore në të cilat Klosi u ndal më tepër, kishin të bënin me sigurinë e jetës së pushuesve, pastërtinë e mjedisit si dhe cilësinë e shërbimeve.
“Vendimmarrja për bashkitë tani në muajin Prill të ndahet se kush janë operatorët që do të administrojnë plazhin. Brenda muajit Prill, maksimalisht në fillim të muajit Maj do duhet të administrojmë siç duhet hartat e vendosjes së zhurmave.
Instituti i Higjienës, AKU dhe Inspektoriati i Mjedisit të bëjnë që sot një verifikim në terren të gjithë këtyre subjekteve që ne kemi evidentuar nga tr operatorët që të jenë subjekte që do presin sërish turistë të huaj. Të paktën për gjëra që ne i kemi në dorë, të jemi korrekt dhe të kontrolluar. Edhe eliminimi i gropave septike, apo mekanizmave që iu ka ikur koha për të kryer këtë funksion janë evidentuar nga Inspektoriati i Mjedisit dhe të gjitha këto, Inspektoriati do të ketë një forcë më të madhe për të kontrolluar dhe vendosur deporatorët e standardeve të lejuara për deporimin e ujërave të zeza gjatë sezonit turistik”, -u shpreh ministri.
Sipas Klosit synimi që ka ministria e Turizmit dhe Mjedisit është kthimi i Shqipërisë në një destinacion të qëndrueshëm turistik dhe gjithashtu dhe zgjatja e sezonit përtej periudhës nga Qershori në Shtator./Opinion.al/
