Mbreti i Spanjës, Filipi VI, kryesoi në Palacio de Cibeles, darkën përkujtimore të 40 vjetorit të Panairit Ndërkombëtar të Turizmit, me autoritetet më të larta të huaja dhe ministrat e Turizmit, që organizohet nga IFEMA me mbështetjen e Organizatës Botërore të Turizmit (UNWTO).
I pranishëm në këtë darkë ishte dhe Ministri shqiptar i Turizmit, Blendi Klosi si dhe Sekretari i Përgjithshëm i UNWTO, Zurab Pololikashvili. Ky event u zhvillua pas shpalljes nga UNWTO të tetë fituesve të konkursit të Kompanive të Reja të Turizmit. Filluar në vitin 2018, kjo iniciativë punon për të identifikuar dhe shpërblyer kompanitë e reja që do të udhëheqin transformimin e sektorit global të turizmit në kuadrin e inovacionit dhe qëndrueshmërisë.
Pas darkës së mbrëmshme nis edhe panairi FITUR që është panairi më i madh dhe më i rëndësishëm i tregtisë së turizmit në Spanjë.
Kujtojmë se një javë më parë, UNWTO iu bashkua Ministrisë së Turizmit të Shqipërisë për një Samit të veçantë për Turizmin për Solidaritetin dhe Qëndrueshmërinë i cili u zhvillua për rimëkëmbjen e turizmit në zonat e prekura nga tërmeti.
Zyrtarë të nivelit të lartë nga agjensia e specializuar e Kombeve të Bashkuara iu bashkuan këtij samiti për të diskutuar rolin e turizmit në udhëheqjen e rimëkëmbjes nga një krizë humanitare. Praktikat më të mira u ndanë dhe roli i publikut dhe privatit gjithashtu u analizuan në detaje. /Opinion.al
