“Moska mund të jetë duke përgatitur “diçka të keqe” për përvjetorin e pavarësisë së Ukrainës më 24 gusht”. Ky ka qenë paralajmërimi i presidentit ukrainas Volodymyr Zelensky. 24 gushti shënon gjashtë muaj nga nisja e pushtimit rus.
Zelensky bëri thirrje për vigjilencë pasi bombardime u regjistruan pranë termocentralit më të madh bërthamor të Evropës dhe raketat ruse goditën objektivat pranë Odessa, porti i Detit të Zi të Ukrainës dhe qendra e eksportit të grurit.
Luftimet pranë Zaporizhia dhe sulmi me raketa i së shtunës në qytetin jugor të Ukrainës, Voznesensk, i cili nuk është shumë larg nga termocentrali i dytë më i madh bërthamor i Ukrainës, kanë shkaktuar frikë për një incident bërthamor.
Në të njëjtën kohë, Kievi mohon çdo përfshirje në vdekjen e vajzës së Alexander Dugin, një bashkëpunëtor i ngushtë i Putinit. E reja u vra teksa një bombë që dyshohet se kishte shënjestër të atin shpërtheu në automjetin me të cilën po udhëtonte.
