Pas mbledhjes së sotme të Këshillit Politik, përfaqësuesit e opozitës jashtë parlamentit, Oerd Bylykbashi dhe Petrit Vasili u shprehën se ishin të gatshëm për arritjen e një konsensusi se çfarë do t’i dërgonin ODIHR, por Gjiknuri braktisi takimin.
“Dorëzuam sot draftin e letrës me të cilën Këshilli Politik t’i drejtohet ODIHR-it. Ne kërkojmë ruajtjen e koalicioneve siç janë sot, ndërsa PS kërkon të ndryshojë rregullat e lojës kur loja ka filluar. Opozita i ka qëndruar marrëveshjes së 14 janarit. Ndryshimet kaluan në parlament dhe për ne u plotësua detyra e këshillit. Sot, sërish PS refuzoi që t’i drejtohemi ODIHR-it, ndërsa përfaqësuesi i PS bojkotoi mbledhjen, ndërsa ishim të gatshëm të vazhdonim deri në gjetjen e një konsensusi se çfarë do t’i dërgonim ODIHR-it. Presim reflektim nga PS”, tha Bylykbashi.
“Qëllimi i këtij Këshilli Politik është arritja e konsensusit për të garantuar standardet ndërkombëtare të zgjedhjeve. Nëse nuk ka konsensus mekanizmi i zgjidhjes së konfliktit është t’i drejtohemi OSBE/ODIHR-it. Prishja e mekanizmit bën nul mënyrën sesi funksionon ky këshill. Opozita ka për draft kodin zgjedhor ekzistues sa i përket koalicioneve. Ata që duan ta ndryshojnë duhet t’i japin llogari opinionit të brendshëm dhe ndërkombëtar”, shtoi Bylykbashi.
Përfaqësuesi i LSI-së në këtë këshill, Petrit Vasili, u shpreh se Gjiknuri po minon këshillin.
“Gjiknuri bojkotoi takimin, ndërsa na tha se vetëm pyetjet që mund të bëjë ai mund të shkojnë te ODIHR, jo pyetjet tona. Gjiknuri pohoi dhe e konsideroi vetëm këshill konsultativ që s’ka vendimmarrje, duke marrë përgjegjësitë për minimin që PS do t’i bëjë këtij këshilli.”.
