Këshilli i Lartë Gjyqësor ka nisur procedurat për shqyrtimin e kërkesës për shkarkimin nga detyra të gjyqtares së Krujës, Enkeleida Hoxha.
Kërkesa për shkarkimin e gjyqtares Hoxha ka ardhur nga ILD pas vrasjes së Hekuran Billës.
Hekuran Billa u vra mbrëmjen e 11 Qershorit te “Komuna e Parisit” në Tiranë. Billa ishte dënuar përjetë për një vrasje në Angli, ndërsa gjyqtarja Hoxha i pranoi kërkesën për lirim nga qelia. Ai ishte dënuar konkretisht me 25 vite burg por 10 vite para përfundimit të dënimit, Hoxha i fali 5 vite Billës, ndërkohë që 5 vitet e fundit i konvertoi në shërbim prove, duke e nxjerrë atë menjëherë nga qelia. Hetimi për lirimin e Billës nisi pas ekzekutimit të tij.
Emri i gjyqtares së Krujës Enkeleida Hoxha lidhet me lirimin nga burgu të disa të dënuarve, përmes vendimeve të dyshimta. Enkeleida Hoxha u ka hapur dyert e burgut ish-numrit dy të bandës së Durrësit Endrit Dokle, duke i shuar dënimin përjetë, Genc Tafilit, i dënuar për vrasjen e komisarit të Policisë Arben Zylyftari si dhe Ilir Pajës, të cilit i kishte mbetur mbi një vit dënim.
Kanë qenë 6 vendime të marra nga Hoxha në harkun kohor nga maj 2017- shkurt 2019 të cilët sipas hetimeve kanë rezultuar me shkelje dhe kanë tërhequr vëmendjen e ILD-së.
Nisur nga kjo ka qenë Inspektorati i Lartë i Drejtësisë organi që kërkoi shkarkimin nga detyra të gjyqtares Enkelejda Hoxha.
Në janar të këtij viti, Ministrja e Drejtësisë Etilda Gjonaj kërkoi pezullimin e gjyqtares Hoxha nga detyra./Opinion.al
