Presidenti i vendit Ilir Meta ka reaguar lidhur me protestat e maturantëve dhe kontesimin nga ana e tyre të pyetjeve të përzgjedhura në testin e letërsisë dhe gjuhës shqipe. Duke kërkuar transparencë, Meta ka bërë thirrje që Komiteti i Maturës Shtetërore të marr në shqyrtim kërkesat e maturantëve.
“Po ndjek me shqetësim protestën e maturantëve dhe kërkesat e tyre ndaj autoriteteve përgjegjëse. I bëj thirrje Komitetit të Maturës Shtetërore që në përmbushje të detyrimit ligjor dhe përballë kërkesave të studentëve, në transparencë të plotë, të marrë sa më parë në shqyrtim të gjitha shqetësimet e tyre dhe t’u përgjigjet me përgjegjësi të plotë. Edhe zëri i vetëm i një maturanti duhet dëgjuar, vlerësuar dhe sqaruar për paqartësitë dhe vështirësitë që ka hasur në këtë kohë pandemie. Viti që kaloi ka qenë shumë i vështirë për të gjithë sistemin arsimor, por në mënyrë të veçantë për maturantët tanë. Provimi i Maturës Shtetërore të shërbejë si një vlerësim i drejtë i dijeve të tyre në kohë të vështira, dhe jo si një ndëshkim ndaj pamundësisë objektive të studentëve dhe kufizimeve të pamerituara për arritjen e rezultateve të kërkuara”, shkruan Meta në rrjetin social Facebook./Opinional
