Këtë të premte është mbajtur mbledhja e Këshillit të Legjislacionit, ku po diskutohej kërkesa e PD-së për shkarkimin e Lindita Nikollës si kryeparlamentare.
Në përfundim të mbledhjes që u zhvillua me debate, deputetët e PD-së Dhurata Çupi dhe Saimir Koreshi në një deklaratë për mediat, thanë se në mbledhje u lexua vetëm raporti i Partisë Socialiste ndërsa nuk u lexua raporti i PD sepse deputeti Gazment Bardhi, i caktuar si relator u përjashtua nga Kuvendi për një afat 10 ditor.
“Këshilli i legjislacionit u vu në lëvizje për shkak të kërkesës së 28 deputetëve të opozitës për shkarkimin e kryeparlamentares lidhur me zhvillimet në seancën e 6 janarit. Mbledhjen nuk keni mundur ta ndiqni pasi nuk është lejuar as prania e gazetarëve. Këtë mbledhje debatuam dhe nuk lejuan që kamerat dhe mbledhja të jetë në transparencë. Pasi Këshilli i Legjislacionit mbylli punimet, Bardhi u përjashtua për 10 ditë nga seanca plenare e rradhës. Ata përjashtuan Bardhin në mënyrë që me votën e kartonit të vendosnin që mbledhjet të mos ishin live dhe diskutimi të mos ishte publik dhe që raporti të mos lexohej nga Bardhi”-tha Çupi.
Ndërkohë, Koreshi tha se PS përgjigjen do e marrë nesër me protestën e opozitës.
“Shpejtësia me të cilin marrin këtë vendim është se në momentin kur do kalojë në Kuvend 9 deputetë demokratë nuk do jenë të pranishëm. Këta e kanë si me qef të hënën ta fusin raportin, por dhe të enjten prapë kolegët tanë s’janë. Palaçot e Komisionit të Etikës votuan. Ky komision duhet të kishte marrë vendim para 6 ditësh. Vetë e firmosën dhe pastaj vijë të hënën. Ky është një palaçollëk që bëjnë, por ndoshta përgjigjen e marrin nesër.”, tha ai.
