Pas kërkesës së SPAK për arrestimin e ish-zvendës/kryeministrit Arben Ahmetajt, Kryetarja e Kuvendit, Lindita Nikolla ka thirrur mbledhjen e Këshillit për Rregulloren dhe Mandatet.
Sipas dokumentit të firmosur nga Nikolla, mbledhja do të zhvillohet ditën e nesërme më datë 11 Korrik ora 16:00.
Në urdhrin e Nikollës thuhet: “Urdhëroj thirrjen e Këshillit për Rregulloren, Mandatet dhe Imunitetin, datë 11.07.2023, ora 16:00 në Kryesinë e Kuvendit”.
Rendi i ditës do të jetë “shqyrtimi i kërkesës së Prokurorisë së Posaçme Kundër Korrupsionit dhe Krimit të Organizuar, për dhënien e autorizimi nga Kuvendi për arrestim/heqje e lirisë dhe ushtrimin e kontrollit personal/të banesës së deputetit të Kuvendit të Shqipërisë, Arben Ahmetaj”.
Ashtu siç cilësohej edhe në kërkesën e SPAK, mbledhja e Këshillit për Rregulloren, Mandatet dhe Imunitetin do të zhvillohet me dyer të mbyllura.
SPAK i është drejtuar me një kërkesë zyrtare Kuvendit të Republikës së Shqipërisë, ditën e premte, ku i kërkon autorizim për arrestimin e ish-zëvendëskryeministrit Arben Ahmetaj.
Ahmetaj është nën hetim nga Prokuroria e Posaçme në lidhje me çështjen e inceneratorëve.
Ai akuzohet për 3 vepra penale; korrupsion pasiv, pastrim parash dhe deklarim i rremë e fshehje pasurie./Opinion.al
