Komisioni Evropian rekomandoi nisjen e negociatave të anëtarësimit me Ukrainën dhe Moldavinë, si dhe dhënien e statusit të vendit kandidat për Gjeorgjinë.
KE rekomandoi edhe hapjen e negociatave të anëtarësimit të Bosnje e Hercegovinës me BE-në, kur të arrihet shkalla e nevojshme e pajtueshmërisë me kriteret për anëtarësim. Komisioni do t’i raportojë Këshillit deri në mars 2024 për çdo progres.
Kjo është deklaruar nga presidentja e Komisionit Evropian, Ursula von der Leyen, gjatë prezantimit të progres-raportit dhe paketës së zgjerimit të Ballkanit Perëndimor. Sipas Von der Leyen, Ukraina ka përmbushur katër nga shtatë parakushtet për hapjen e negociatave, ndërkohë që ka ende punë për t’u bërë në luftën kundër korrupsionit, deoligarkizimit dhe të drejtave të pakicave.
Po kështu edhe Moldavia duhet të finalizojë reformat gjyqësore dhe të prezantojë masa të mëtejshme kundër korrupsionit.
Udhëheqësit e BE-së mund të mbështesin hapjen e bisedimeve të pranimit gjatë samitit të ardhshëm të Këshillit Evropian më 12 dhjetor, një vendim që kërkon bekimin unanim të të 27 vendeve anëtare.
Komisioni Evropian rekomandoi gjithashtu përmirësimin e Gjeorgjisë në statusin e vendit zyrtar kandidat për në BE.
Edhe Bosnjë Hercegovina, sipas presidentes së KE-së ka bërë përpjekje pozitive në rrugën drejt anëtarësimit në BE, sa i takon impenjimeve politike të partive dhe luftës kundër korrupsionit, por shqetësuese sipas saj janë ligjet kushtetuese referuar Republikës Srpska.
Gjatë fjalës së saj presidentja e KE-së tha se “zgjerimi është një politikë jetike për Bashkimin Evropian.
