Komisioni i Ankimimeve dhe Sanksioneve ka rrëzuar kërkesën e Partisë Socialiste për të mos regjistruar si kandidat të pavarur Gjergji Mërkurin në Sarandë.
KAS vendosi ditën e sotme moskalimin për shqyrtim të kësaj kërkese.
“KAS përfundon shqyrtimi i kërkesave ankimore ndaj vendimeve të KZAZ-së nr. 71 dhe KZAZ-së nr. 82 Komisioni i Ankimimeve dhe Sanksioneve shqyrtoi elementët e formës dhe të përmbajtjes së kërkesës ankimore nr. 42, me ankues Partia Socialiste e Shqipërisë dhe objekt “Ndryshimin e vendimit nr. 31, datë 28.03.2023, të KZAZ nr. 90, Sarandë. Mosregjistrimin e kandidatit për kryetar të njësisë së qeverisjes vendore të z. Gjergj Filip Mërkuri”. Në përfundim të shqyrtimit paraprak, KAS vendosi moskalimin për shqyrtim të kësaj kërkese”, njofton KQZ.
Partia Socialiste depozitoi në KAS një ankimimin përmes së cilit kërkonte mosregjistrimin në zgjedhjet vendore të kandidatit të pavarur Gjergj Mërkuri.
Në kërkesën e depozituar nga përfaqësuesi i PS-së në KQZ, Eridian Salianji thuhej se Gjergji Mërkuri ka falsifikuar firmat e qytetarëve dhe për këtë arsye PS kërkon që të mos futej në garën elektorale të 14 majit.
