Deputetit konservator Johnny Mercer do t’i duhet të paguajë më shumë se 900 paund pas një hetimi mbi shpenzimet e tij, ku ndër të tjera vihen re telefonata të tij me një numër shqiptar.
Sipas BBC, mbikëqyrësit e shpenzimeve të deputetëve vunë re se faturat e telefonit të deputetit u rritën ndjeshëm, nga një mesatare mujore prej 100 në 660 paund në mars të vitit 2016.
Deputeti pretendoi se kjo vinte për shkak se telefonat e tij ishin hakuar por ISPA (Autoriteti i Pavarur i Standardeve Parlamentare) e kundërshtoi duke thënë se nëse kjo do të kishte ndodhur, ai duhet të kishte raportuar mbikqyrësit, gjë që nuk ka ndodhur.
Në telefonin e tij u gjetën rreth 65 thirrje prej një deri në 30 minuta me të njëjtin numër shqiptar më 20 mars dhe orët para të 21 marsit, duke kushtuar rreth 466 paund.
Veç kësaj për të kishte dhe ankesa të tjera, duke përfshirë faktin se zoti Mercer kishte regjistruar disa emra të domain-it, që kushtonin 108 paund. Z. Mercer tha se i bleu emrat e domain-it për siguri dhe për të parandaluar të tjerët që të krijonin faqe të dublikuara.
Por dhe pse u mundua të justifikojë shpenzimet e tij IPSA arriti në përfundimin se nuk ka prova që asnjë nga shkeljet janë gjë tjetër veç gabime të vërteta, të cilat mund të ishin shmangur me administrim dhe mbikëqyrje më të mirë ndaj detyroi deputetin të paguante 931.20 paund. /E.M
