“Vlora vuan prej vitesh mungesën e hapësirave për parkime, ndërkohë dhe prezencën e automjeteve mbi trotuarë, të cilat shkaktojnë probleme në qarkullim. Ky fenomen ndihet në 12 muaj të vitit, por më tepër gjatë sezonit veror me rritjen e fluksit të turistëve”, raporton gazetarja Greta Haskaj.
Rruga e Unazës që prej lagjes “10 Korriku” në Vlorë, duke vijuar pranë lagjes “Uji i Ftohtë”, është një kaos i vërtetë automjetesh të parkuara në mënyrë të parregullt.
Edhe kur tabelat e tregojnë qartë se parkimi nuk është i lejuar, qytetarë të papërgjegjshëm veprojnë në kundërshtim me ligjin.
Situata është e njëjtë në çdo orë të ditës dhe çdo ditë të javës, veçanërisht gjatë sezonit turistik, ku fluksi i makinave është më i madh. Këto makina të parkuara në kundërshtim me tabelat e bllokojnë trafikun për minuta me radhë. Por policia bashkiake e Vlorës nuk ndërhyn, a thua se është krijuar për të kontrolluar ndonjë qytet tjetër dhe jo Vlorën.
Qytetarët shprehen të shqetësuar dhe e kërkojnë përgjegjësinë te institucionet. Thonë se pjesa më e madhe e hapësirave zaptohen nga automjete që janë në shitje apo jepen me qira.
Një sipërfaqe e konsiderueshme toke publike në zonën e njohur si “Shkolla e Marinës” në Vlorë, e cila ishte zënë në mënyrë të paligjshme dhe shfrytëzohej si parking, është liruar pas ankesave të shumta të banorëve.
Sipas njoftimit të Policisë, për këtë rast është nisur procedim penal ndaj një personi që paraqitej si pronar i truallit, si dhe ndaj drejtorit të Policisë Bashkiake të Vlorës, Emiliano Ismaili, i akuzuar për shpërdorim detyre.
Vitin e shkuar, Bashkia e Vlorës paraqiti në Këshillin Bashkiak projektin “Vlora Parking” që do të ndihmonte në zgjidhjen e situatës së parkimeve në qytetin bregdetar, por projekti ka mbetur vetëm në letër.
Tv Klan
