Masat e reja të vendosura nga autoritetet në SHBA për përballimin e përhapjes së koronavirusit kanë shkaktuar kaos në aeroportet e vendit. Udhëtarët që kthehshin nga Europa kanë pritur me orë të tëra në radhë të gjata teksa prisnin të kalonin kontrollin për koronavirus në pikat doganore.
SHBA ka zgjeruar gjithashtu hartën e vendeve që prek urdhri i ndalimit të udhëtimeve , duke përfshirë në të Mbretërinë e Bashkuar dhe Irlandën. Aktualisht Shtetet e Bashkuara numërojnë mbi 2700 raste me Covid-19, dhe 54 viktima.
Kaotike paraqitet situata edhe në Europë e cila tashmë është konsideruar qendra e pandemisë nga OBSH-ja duke parë zhvillimet e fundit në Kinë. Italia numëron mbi 21 mijë persona janë infektuar me Covid-19, dhe mbi 1400 vetë kanë humbur jetën. Vendi është në izolim të plotë por ende nuk ka rezultate domethënëse si pasojë e keqmenazhimit të situatës në fazat e saj të para.
Pas Italisë, situata më e vështirë paraqitet në Spanjë ku 191 persona kanë humbur jetën deri tani nga pandemia. Qeveria ka shpallur gjendjen e emergjencës kombëtare. Madridi mbetet qyteti më i goditur, ndërsa 6,6 milionë banorët e tij kanë respektuar thirrjen për të qëndruar në shtëpi, ashtu si dhe pjesa tjetër e vendit. Spanja numëron mbi 6 mijë të infektuar me koronavirus, mes të cilëve dhe bashkëshortja e kryeministrit Pedro Sanchez.
Franca nga ana tjetër po mban zgjedhjet lokale. Megjithatë pritet të ketë një abstenim masiv, nga frika e përhapjes së koronavirusit dhe vështirë që qytetarët tu drejtohen kutive të votimit. Në Francë, 4500 vetë janë infektuar me Covid-19 dhe 91 persona kanë humbur jetën. /Opinion.al
