Altin Çoku i arrestuar disa ditë më parë për “Shkaktimit të vetëvrasjes” të 27-vjeçares Sibela Abedini rrezikon të mbetet në qeli.
Prokuroria e Tiranës ka dorëzuar dosjen në gjykatë dhe ka kërkuar të caktohet masa e sigurimit “arrest në burg”. Seanca do të zhvillohet të enjten.
Kjo nuk është hera e parë që Çoku arrestohet dhe dënohet nga drejtësia. Në vitin 2015 ai është dënuar nga Gjykata e Apelit për Krime të Rënda për veprën penale “shtrëngim me atë të kanosjes” ose “dhunës për dhënie të pasurisë”, shkruan KlanNews.
Në vendimin e gjykatës thuhet se Çoku ka kërcënuar me jetë mjekun neuro-psikiatër me iniciale G.S. Ata të dy njiheshin pasi mjeku e ka pasur Çokun pacient. Në vendim thuhet se në Qershor të vitit 2014, Altin Çoku i ka shkuar në zyrë dhe i ka kërkuar lekë për të mjekuar vajzën e tij dhe për t’ia dhënë avokatit për një çështje që kishte. Përveç mesazheve në telefon ai i kishte dërguar doktorit edhe një letër në të cilën i shkruan:
“Gëzim unë jam në hall dhe me ndihmo po dashte me i marr lekët tuja dhe nëse nuk do me pas gjakderdhje unë për 5 minuta jam dhe vet aty. Gëzim me ndihmo të lutem deri nesër. Tani gjej ku të dush 1000 euro deri neser ose kam me vra kush të më dali para. Unë jam ke shpija më bëj sms a të vij sipër e ti marr apo nuk ke gjet. Shiko se fole me njeri se un o ti gjall pastaj”.
Mjeku ka sqaruar në atë kohë se i kishte dhënë disa herë Çokut para. Vlera totale e tyre ishte 4 mijë euro, i detyruar për shkak të kërcënimeve të herëpashershme. Në total mjekut i janë dërguar 6 mesazhe kërcënuese. Në atë kohë Gjykata e Apelit për Krime të Rënda e gjeti fajtor për kanosje, por e dënoi me 5 vite shërbim prove për shkak të problemeve fizike që ai kishte.
