Sulmuesi i Lazios, Ciro Immobile është përfshirë në një aksident të frikshëm pranë stadiumit Olimpico në Romë, teksa makina e tij është përplasur me një tramvaj. 33-vjeçari shpëtoi pa dëmtime serioze teksa pati probleme vetëm në krah.
Futbollisti italian nën drejtimin e një automjeti tip “Land Rover Defender” nuk ka pësuar dëmtime të rënda, ndërkohë “Corriere Dello Sport” raporton se në spital gjenden dy vajzat e tij, të cilët ndodheshin në makinë me Immobile.
“Kam pak dhimbje në krah. Tramvaji kaloi me semafor të kuq” tha shkurtimisht Immobile për mediat italiane.
Sa i takon rrethanave të aksidentit, Immobile pretendon se faji ishte i tramvajit që kaloi me semafor të kuq dhe më pas u përplas me makinën e futbollistit.
Përplasja e fortë me tramvajin ka bërë që mjeti të dilte nga shinat, teksa raportohet se deri më tani janë shtatë persona që po marrin ndihmë mjekësore në spital./Opinion.al
