Një ngjarje që është denoncuar fillimisht si një histori pengmarrjeje dhe plagosje e një 19-vjeçare, ka rezultuar tërësisht një histori e sajuar nga vetë “e dëmtuara”, e cila në fund ka përfunduar në pranga për kallëzim të rremë.
Burime nga policia thanë se bëhet fjalë për shtetasen Elsa Kazanxhiu, e cila, pasi ka vënë në alarm për disa orë Policinë e Shtetit, në fund ka pranuar se e ka sajuar ngjarjen, pasi ish-bashkëshorti nuk e lejonte të takonte djalin e mitur.
Të njëjtat burime thanë se dje, rreth orës 04:30, disa kalimtarë të rastit kanë telefonuar në sallën operative, duke thënë se një vajzë e gjakosur në fytyrë kishte kërkuar ndihmë në rrugën “Vaso Pasha”, në Tiranë.
Menjëherë në vendin e ngjarjes kanë shkuar shërbimet e Komisariatit nr.3, që kanë shoqëruar të dëmtuarën në Spitalin e Traumës, ku është mjekuar në fytyrë dhe në disa pjesë të trupit.
Në deklarimin paraprak ajo ka pretenduar se ishte mbajtur peng për një javë rresht nga disa persona, të cilët ishin autorë edhe të plagosjes së saj.
Por gjithçka është zbuluar kur Policia ka shoqëruar gjatë paradites së djeshme familjarët e saj dhe të bashkëshortit aktual, që kanë hedhur poshtë ngjarjen.
Më pas, ajo ka pranuar se gjithçka e kishte sajuar vetë, pasi ish-bashkëshorti i saj, që jeton në Vlorë, i cili ka dhe kujdestarinë e fëmijës së tyre të mitur, nuk e lejonte ta takonte.
Pas kësaj, ajo është vënë në pranga për kallëzim të rremë.
Por sikur të mos mjaftonte kjo, është akuzuar edhe për vjedhje nga kunata e saj e cila pretendonte se 19 vjeçarja i kishte vjedhur disa rroba, bizhuteri dhe një sasi parash në shtëpi./panorama.al
