Në fund të Dhjetorit të vitit 2022, në redaksinë e emisionit “Stop” trokiti Teuta Gjolena. Pas ndarjes nga jeta të kryefamiljarit, familja e saj iu drejtua Kadastrës, që të bëhej njohja e tyre si trashëgimtarë, pasi nuk kishin një dokument pronësie.
Shtëpia ishte banuar që nga vitet ‘80. Gjykata e Beratit e më pas ajo e Apelit Vlorë, urdhëruan bashkinë e Kuçovës dhe Kadastrën e Kuçovës, që të njihnin 5 trashëgimtarët si pronarë të një apartamenti 2+1 në fshatin Perondi.
Kadastra u shpreh se nuk mund të bëhet regjistrimi, sepse bashkia si palë e paditur, nuk është pronare e kësaj banese.
Ndërkohë në regjistrat e Kadastrës pamë emrin e kryefamiljarit të ndjerë. Këto banesa janë përftuar nga ish-ndërmarrjet e aviacionit para shumë viteve. Pas kaq muajsh qytetarja Teuta Gjolena tregoi, se i ka ardhur sërish përgjigje refuzuese nga ana e Kadastrës së Kuçovës.
“Stop” dhe qytetarja i ridrejtohen Kadastrës qendrore me shkresa zyrtare, në mënyrë që të rishohin vendimin e refuzimit të regjistrimit.
Shkëlqim Braushi, drejtor ASHK, Kuçovë: Unë i thashë zonjushës, që të vijë, të paraqitet në zyrë, për t’i dhënë informacion dhe e dyta, pastaj, për të gjetur një zgjidhje tjetër, se çfarë do vendosim, për të bërë regjistrimin e pronës së saj. Këtu është bërë një shkresë, kur unë nuk kam qenë. Shkova vetë te Drejtoria e Përgjithshme dhe i thashë: “Më interpretoni shkresën, që ka nisur drejtoria në atë kohë, që nuk kam qenë. Nuk e kam lexuar komplet vendimin (e gjykatës). U nisa, thjesht, nga dashamirësia dhe dua ta ndihmoj zonjën.
Gazetari: Përveçse është vendim i formës së prerë sipas gjykatës ky është vendim i fituar me parashkrim fitues sepse ka mbi 20 vjet. Nuk ka pretendentë të tjerë për këtë pronë.
Shkëlqim Braushi, drejtor ASHK, Kuçovë: Përsëri po shkoj në Tiranë për këtë rast. Bëni mirë, që i shponi njëçikë veshët dhe këmbët drejtuesve!/ Tv Klan
