Arben Vokrri ka denoncuar në emisionin “Stop” në Tv Klan konfliktin që ai ka prej shumë vitesh me fqinjët. Shkak për këtë, është bërë, rruga që ndan këto dy familje. Para disa kohësh mes dy familjeve ka ndodhur një sherr dhe Arbeni është dhunuar, pasi kërkoi shpjegim për heqjen e rrjetës para portës.
“Kam një konflikt prej shumë vitesh me komshinjtë që kam këtu afër. Vijnë e bëjnë punime, pa leje dhe pa asgjë. Institucionet janë në dijeni, por nuk kanë dhënë asnjë rrugëzgjidhje. Ne jemi në konflikt të vazhdueshëm. Edhe ditën e djeshme kanë qenë të përgatitur 6 persona dhe unë kërkova shpjegime se me çfarë të drejte kanë ndërtuar gardhin këtu.
Ata kanë ardhur më kanë bllokuar në makinë dhe më kanë dhunuar. Tentova të dilja nga makina, më rrethuan makinën, erdhën na ndanë. Ata më ndoqën dhe erdhën më dhunuar tek dhoma, me grushte me shkelma. 6 persona unë nuk kisha fuqi t’i përballoja. Policinë e kisha njoftuar që kur u nisa për në shtëpi”, ka treguar Arbeni nga Miloti.
Pas këtij denoncimi, gazetari i emisionit “Stop” i është drejtuar familjes e cila akuzohet nga Arbeni se po kryen punime pa leje. Një anëtar i familjes Ndreca shprehet se ata kanë tentuar që të rregullojnë rrugën edhe pse është pronë shtetërore.
Gazetari: Kush prej jush shkoi në banesën e tyre dhe dhunoi?
Familja Ndreca: Nuk kemi shkuar në banesën e tyre. Jo! Këto janë mashtrime.
Gazetari: Po kush e dhunoi zotërinë?
Familja Ndreca: Askush. Ka dhunuar veten e vet.
Gazetari: U përdor dhunë ndaj tyre?
Familja Ndreca: Jo, nga ne jo.
Gazetari: Sa vetë keni qenë ju?
Familja Ndreca: Kam qenë unë e një nipi im. Nuk kemi dhunuar askënd.
Gazetari: Pretendimi i tyre është, që ju keni cenuar pronën e tyre.
Familja Ndreca: Asnjëherë, jo! Është prona ime, që ma ka dhënë shteti.
Pas ballafaqimit me të dyja familjet “Stop” iu drejtuar Njësisë Administrative Milot. Dritan Preçi, administratori i kësaj njësie thotë, se ditën e sherrit ka dhënë një leje, që fqinjët të punojnë për rikonstruksionin e sheshit para portës
Dritan Preçi, administrator: Zotëria tjetër më ka ardhur, që të shtrojë pjesën përpara të rrugës.
Gazetari: Ku përpara?
Dritan Preçi, administrator: Pjesën te porta e vet e deri te kthesa. E kemi bllokuar për momentin, që ta shohim, se ku duhet bërë tamam.
Gazetari: A nuk do ishte mirë, që ju të shikonit dokumentacionin dhe më pas të lëshonit një leje?
Dritan Preçi, administrator: Jam marrë tri -katër herë me atë rrugë.
Gazetari: E keni firmosur pikërisht dje, ditën, kur…
Arben Vokrri: Mbasi më kanë rrahur.
Dritan Preçi, administrator: Më përpara.
Gazetari: I sigurt?
Dritan Preçi, administrator: I sigurt, se nuk kam arsye.
Denoncuesi: Pse nuk ia nxorën policisë, kur erdhën dje? Kur filluan punimet, pse nuk ia ke dhënë letrën me vete ti? Të më paraqisnin letrën mua, që jemi me dokumentacion të shtetit.
Dritan Preçi, administrator: Kush? Duhej të paraqisnin ty leje? Kam qenë vetë aty dje.
Denoncuesi: Ti nuk më ke sjellë dokument, më ke thënë “vendose gardhin ku e ke pasur”. Unë nuk të sjell ty dokument, fare!
Denoncuesi: Apo kanë hedhur Lekë ata gjithë natën dhe ua ke plotësuar?
Nga ana tjetwr Bashkia Kurbin pretendon, se ka pasur një ankesë prej familjes Ndreca duke thënë se rruga është bllokuar nga familja Vokrri.
Drejtori i Bujqësisë dhe Mjedisit, Bashkia Kurbin: Unw kam qenw nw terren tek zotwria nw fjalw dhe i kam thënë, se kufiri i pronës tënde është nga rruga e andej. Andej nuk ke punë, se nuk është prona jote. Rruga është shtetërore dhe nuk preket, as nga ti e as nga pala tjetër. Ai ka bërë një kërkesë për bllokim rruge. Shkuam në terren dhe nuk kishte rrugë të bllokuar.
Gazetari: Leja është dhënë nga Njësia Milot. A duhej të ishte vënë në dijeni Bashkia e Kurbinit?
Drejtori: Po, si rregull, po!
Gazetari: Si do të ketë një zgjidhje?
Drejtori: Duhet të më sjellin, të dyja palët, dokumentacionin!
Kjo çështje tashmë ka kaluar në Prokurorinë e Kurbinit, por ende duket se situata nuk është zgjidhur dhe konflikti mes dy familjeve vijon duke qenë se institucionet shtetërore nuk kanë vepruar siç duhet./Tv Klan
