Juventus-Inter duket se nuk do të mbarojë kurrë. Pas polemikave në përfundim të ndeshjes së fituar 1-0 nga bardhezinjtë kundër zikaltërve, derbi i Italisë (ose i polemikave) është pasuruar me një kapitull tjetër. “Falë” menaxherit të Marcelo Brozovic, Miroslav Bicanic, sipas të cilit fraktura e gishtit të këmbës së djathtë të mesfushorit internist është shkaktuar nga Pjanic. “Marcelo më ka thënë se është larguar nga fusha për shkak të një dëmtimit. Pjanic i ka shkelur gishtin dy herë, në pjesën e parë dhe në të dytën”, ka thënë menaxheri.
Këto deklrata kanë përgënjeshtruar zërat sipas të cilëve Brozovic është dëmtuar pasi ka goditur me shqelm një nga shkallët e stolit të zikaltërve në “Juventus Stadium” menjëherë pas zëvendësimit. Një gjest ky që nuk është pëlqyer aspak nga Pioli. Nëse kjo goditje ka kontribuar sadopak te dëmtimi i tij, akoma nuk është e qartë. Ajo që është e sigurt, është se Inter nuk do ta ketë në dispozicion lojtarin për të paktën dy ose tri javë.
