Mirel Josa është prezantuar sot nga presidenti i KF Tiranës, Refik Halili si trajneri që pason Ilir Dajën.
Në konfërencen për shtyp të mbajtur në mesditë në ambientet e “Selman Stërmasit”, Josa ka folur rreth marrjes në drejtim të ekipit të ekipit bardheblu dhe pritshmëritë që ai ka.
“ E marr drejtimin e skaudrës së Tiranës për herën e tretë. Rastësia është se në të tria rastet, këtë ekip e drejtoj në mesin e sezonit dhe jo në fillim të kampionatit.
Sigurisht që të jesh trajner i Tiranës është një përgjegjësi e madhe. E them këtë duke u nisur nga kërkesat që ka ky klub . I njoh vështirësitë e kësaj detyre dhe nuk është e njejta gjë sikur të drejtosh Skëndërbeun.
Premtime? Nuk bëj premtime, sepse ato i merr era. Nuk duhet të përmendim fjalën titull, sepse mund të na dëmtojë. Ajo çka kërkoj nga ekipi është të ketë harmoni brenda grupit.
Skuadra është e kompletuar dhe ka luajtur mirë, duke pasur edhe rezultate. Një gjë të tillë e kam deklaruar edhe në intervistat e fundit që kam dhënë në lidhje me Tiranën. Lojtarët? I njoh në përgjithësi, por skuadrën do ta shoh nga afër në momentin që do nisi stërvitjen”, ka deklaruar Mirel Josa në konfrencën për shtyp.
