Në një lidhje direkte për Klan News me Drini Zeqon, demokratja Jorida Tabaku falenderoi të gjithë komisionerët, të cilët janë angazhuar në numërimin e fletëve të votimit.
“Vota e kandidatëve do të fillohet të lexohet sot, ne kemi vetëm dy votimet elektronike. Dhe unë duket që kam marrë mbështetje, por nuk ka rëndësi mbështetja ime. Ne shohim të gjithën. Unë nuk dua të ndalem të bëj analizë në këtë moment, apo ndonjë deklaratë të veçantë.
Doja të lidhesha me ju për të falenderuar të gjithë këta numërues të Partisë Demokratike që janë duke bërë një punë të jashtzakonshme, jo vetëm këtu, por në secilën prej degëve. Dhe nga ana tjetër ka ecur gjithë natën numërimi, nuk ka patur asnjë incident. Janë njerëz që ndoshta nuk janë shumë të motivuar edhe prej rezultatit dhe janë këtu duke bërë punën e tyre. falenderimi i parë shkon për to”, është shprehur Tabaku.
Sa i përket procesit zgjedhor më 11 Maj, Tabaku nuk preferoi të bënte një komentë personal. Ajo citoi raportin e të OSBE/ODIHR, ku tha se nuk dimë të organizojmë zgjedhje.
“OSBE/ODIHR pati një raport dje që foli përtej fjalëve që mund të flasë një politikan. Shqipëria nuk di të organizojë zgjedhje. Ne nuk dimë të bëjmë zgjedhje. Kjo është përfundimisht ajo që thotë OBSE/ODIHR. Përdorimi i burimeve shtetërorem, përdorimi i grupeve kriminale, intimidimi i votuesve, presioni mbi administratën publike, vendimet e qeverisë, që një ditë para zgjedhjeve fali gjobat, u dha pensionistëve një pagesë. Janë të gjithë tregues që ne nuk dimë të bëjmë zgjedhje. Është fatkeqësi që në vitin ku janë hapur negociatat, ne realizojmë procesin më të keq të mundshëm elektoral”, është shprehur Tabaku.
