Deputetja e PD-së, Jorida Tabaku gjatë këtij viti në Parlament është parë të kundërshtojë ashpër, si dhe të prezantojë amandamente për Ligjin e Investimeve Strategjike dhe për Ligjin e Turizmit.
Sipas saj, të dy ligjet kanë në thelb të njëjtin parim: shteti në mënyrë arbitrare vlerëson një investim si strategjik, miraton investimin e më pas pronën publike a private ia jep këtij investitori duke shpronësuar privatin me çmim shtetëror, kur privati mund t’ia shesë vetë investitorit me çmim tregu.
“Shteti jo vetëm hyn në mënyrë abusive në një marrëdhënie ndërmjet dy privatëve, por cënon dhe të drejtën bazë atë të pronësisë! Për të dy ligjet në mbrojtje të së drejtës së pronarëve paraqita amendamente të cilat u rrëzuan dhe u hodhën poshtë”, shkruan Tabaku në profilin personal në facebook.
Ajo thekson se pikërisht këtu fillon gjithcka dhe më Portin e Karpenit.
“Me këtë ligj abuziv i janë dhënë 1700 ha tokë publike e pronë e 220 pronarëve legjitimë, një investitori fantazmë privat! Që pronësia I ndryshon sa nga Londra në Singapor!”, shkruan deputetja e PD-së.
Ndërsa thekson, se ky projekt është i dyshimtë dhe në mungesë totale transparence.
“Fillimisht, Edi Rama ia dha këto 1700 hektarë kompanisë “Star Bridge Port Development Ltd”, me qendër në Britani, e cila rezultoi me një kapital prej 100 paundësh. Ia dha kompanisë me 100 paund, me ca copa letrash ku flitej për ndërtimin e një kompleksi laraman, me lloj lloj objektesh të planifikuara aty”, tha Tabaku.
Më tej, deputetja e PD-së, bën me dije se kjo kompani 100 paundëshe, sipas Edi Ramës do na investoka 5 miliardë dollarë në Karpen, aq sa gjysma e produktit të brendshëm bruto.
Mirëpo, sipas saj, qeveria nuk tregon se në cilin plan territorial është mbështetur, në cilin plan zhvillimor është menduar, ku është studimi i feasibilitetit dhe ku është projekti duke shtuar edhe më shumë hijet e dyshimit.
“Por më e rënda është se kjo kompani, që Edi Rama e bëri pronare të 1700 hektarëve, u shit papritur në Singapor, në një parajsë fiskale atje, vende që vizitohen shpesh nga vëllai i kryeministrit. E njëjta skemë si me koncesionin e TVSH që opozita kundërshtoi dhe detyroi q everinë të tërhiqej”, shkruan ajo.
Tabaku tha se ky projekt, se bashku me Koncesionin e Rrugës së Kombit, është një skandal mbi skandalet në përmbledhjen e gjatë të abuzimeve 3 vjeçare të Edi Ramës.
Ndërkaq, ajo pyet se si mundet një kryeministër të hedhë sa në një cep të botës në tjetrin 1700 hektarë të pasurisë kombëtare?
Duke shtuar edhe një tjetër pyetje, si mundet të flakë në rrugë pronat e 220 familjeve që nuk e dinë se çdo të ndodhë nesër me ta?
“Kush fshihet pas këtij projekti?”, është pyetja që mbyll një shënim të gjatë të shkruar pak minuta më parë nga deputetja e PD-së, Jorida Tabaku në profilin e saj në facebook.
