Deputetja e PD-së, Jorida Tabaku ka reaguar sot në lidhje me buxhetin. Ja deklarata e plotë e saj:
Qeveria ka disa muaj që propagandon se të ardhurat janë në nivele optimale e po tejkalojnë planin e vendosur nga qeveria. Praktikisht, duke pasur një vit të shkuar të mbushur me dështime dhe korrupsion të frikshëm, qeveria u mendua gjatë se si duhet të rregullonte fytyrën. Kësisoj, pezulloi rritjen e taksave të drejtë për drejta, prodhoi një parashikim të pranueshëm dhe në fund përfitoi nga mbledhja e të ardhurave një vit më parë.
Rezultati i gjithë kësaj formule propagandistike ishte një tjetër Akt Normativ (që është antikushtetues) që ka arnuar sërishmi buxhetin më të mirë rilindas. Arnimi i buxhetit ka ulur objektivin e mbledhjes së të ardhurave 4.4 mld lekë megjithëse qeveria pretendon se po tejkalon planin për mbledhjen e të ardhurave.
Sikur kjo të mos mjaftonte, arnimi tradicional i rilindjes, ka prodhuar edhe një ulje të shpenzimeve qeveritare me 3.1 mld lekë dhe kjo ulje vjen në momentin kur qeveria po shet si arritje një suficit të prodhuar në laboratorin e propagandës. Praktikisht përpara se të prodhohej arnimi i radhës, Ministria e Financave ka folur për një suficit buxhetor, që përkthehet në para që shteti i mban në xhep dhe nuk i shpenzon në shërbime apo investime në kompani.
Nga ana ekonomike suficiti buxhetor shpjegohet në tre forma a. Qeveria po mbledh më shumë të ardhura se sa po shpenzon b. Qeveria po kursen shpenzimet për një krizë të mëvonshme c. Qeveria po frenohet nga shpenzimet për të paguar borxhet d. Qeveria po frenohet nga shpenzimet për një investim që do kryejë nesër.
Qartësisht vendi jonë nuk është në pikën e parë, duke qenë se të ardhurat nuk mblidhen më shumë se shpenzimet. Për rrjedhojë mbeten dhe tre mundësi të tjera të cilat duket se nuk po përmbushen nga qeveria, atëherë cili mund të jetë shkaku? Personalisht mendoj që e gjithë kjo formulë nuk lidhet me ekonominë por me propagandën, qeverisë sot i intereson që në fund të vitit të prodhojë një buxhet me një suficit të tillë që t’ua shesë shqiptarëve si një arritje ekonomike të rilindjes.
Imagjinoni impaktin që do të kenë në media qeveritarët propagandues të cilët do të flasin për një arritje heroike të qeverisë rilindase. Kjo e fundit duke i shtrënguar rripin ekonomisë, do ta shesë sapunin për djathë përmes surplusit të sforcuar dhe artificial buxhetor. Praktikisht ky është qëllimi dhe jo vetëm kaq; shitja e këtij sapuni për djathë do të eklipsojë edhe rritjen e borxhit publik po kështu edhe uljen e pagave reale si dhe indeksimin me më pak se sa norma e inflacionit të pensioneve.
Sakaq, qeveria vazhdon të luajë fuqishëm edhe në zërin e koncesioneve për miqtë e tyre të sa e sa pasurive të shqiptarëve. Duke mos u mjaftuar me koncesionin abuziv të rrugës së Kombit që bazuar në disa kalkulime mund t’i japë 9 mln euro të ardhura koncesionarit, ka vendosur që të prodhojë nga hiçi për një kompani pa adresë një tjetër koncesion falas si ai i Karpenit. Angazhime këto që qartësisht nuk janë në shërbim të qytetarëve por interesave dhe xhepave të një qeverie që nuk ka rëndësi se si mbijeton por që vazhdon të jetë varrmihësja e ekonomisë sonë.
Vendimi i qeverisë për Aktin Normativ, i cili vjen në gushtin e pushimeve është sinjali për të na rikujtuar se qeveria tanimë e ka shndërruar këtë muaj të vitit në periudhën e Arnimit Normativ të Buxhetit të Shtetit. Ky i fundit, sipas KLSH-së, vazhdon të plaçkitet duke prodhuar deri më tani një dëm ekonomik në shifrat e 4 mld lekëve (pak më shumë se sa shuma e shkurtuar nga qeveria për shpenzimet në Aktin e fundit Normativ).
Kështu arnimi normativ i qeverisë do të vijë në ditët e para të seancës plenare në Kuvendin e Shqipërisë, që për fatin e keq është shndërruar në një noter duke anashkaluar plotësisht detyrimin kushtetues, ka gjasa të legjitimohet duke u kthyer në një shtrëngim edhe më të fortë mbi qafat e shqiptarëve që përditë po zhyten në një varfëri ekstreme.
