Mijëra francezë kanë protestuar në rrugët e Parisit për të shtunën e katërmbëdhjetë radhazi, në atë që njihet si protesta e jelekverdhëve. Shumë manifestues kanë marshuar nga Champs-Elysées drejt Asamblesë Kombëtare.
Ndërkohë kanë ndodhur tensione në Invalides, ku ishin mbledhur për të protestuar shumë jelekverdhë. Forcat e rendit i ndaluan të kalonin urën Alexandre III. Kjo gjë solli irritimin e tyre, të cilët nisën të sulmojnë policinë me shishe, gurë dhe fishekzjarre. Nga ana e tyre, autoritetet kanë përdorur gazin lotsjellës kundër turmës. Deri më tani janë arrestuar 16 persona.
Një episod i rëndë ka ndodhur ndaj filozofit Alain Finkielkraut. “Hebre i qelbur”, “sionist i ndyrë”, “Franca është e francezëve”, “Palestina”, “populli do të të ndëshkojë”: këto janë frazat me të cilat është ofenduar akademiku Finkielkraut nga një grup protestuesish. Ai ka ndenjur për disa çaste i rrethuar nga manifestuesit, e më pas është larguar nga një person. Filozofi pak ditë më parë kritikoi lëvizjen e jelekverdhëve gjatë një interviste për Le Figaro.
