Situata para dhe pas zgjedhjeve të 30 qershorit në Shqipëri është pasqyruar edhe në mediat ndërkombëtare të cilat kanë komentuar procesin e votimit dhe krizën politike në vend.
Emëruesit e përbashkët të gjithë këtyre shkrimeve ishte fakti që zgjedhje pa opozitën nuk bëheshin që prej daljes së vendit nga diktatura 50 vjeçare, ato kaluan të në mënyrë të qetë dhe se kryeministri Rama ishte treguar i vendosur për kryerjen e zgjedhjeve pavarësisht dekretit të presidentit Meta.
“Opozita e vendit ka bojkotuar zgjedhjet, teksa incidente të vogla ndodhën në qendrat e votimit, Presidenti Meta ka lëshuar një dekret për shtyrjen e zgjedhjeve, por kryeministri Rama e ka refuzuar atë. Madje ai ka fajësuar presidentin, dikur aleat të tij”, shkruan “BBC”.
Ndërsa “Aljazeera” duke iu referuar situatës në vendin tonë, bën me dije se: “Shqiptarët kanë votuar në një situatë të tensionuar por të qetë, teksa zgjedhjet janë kthyer në një pikë krize demokratike, me opozitën që ka bojkotuar zgjedhjet dhe refuzon të njohë rezultatet e saj”.
Në shkrim theksohet se shteti i Ballkanit është goditur nga trazirat politike që nga muaji shkurt, kur deputetët e opozitës hoqën dorë nga mandatet dhe nisën protesta të dhunshme në rrugë kundër kryeministrit Rama, i cili akuzohet për mashtrim dhe korrupsion në zgjedhjet e 2017-ës. Por, ky i fundit i ka mohuar akuzat.
“The Washington Post”, raporton se pavarësisht situatës së tensionuar dhe kërcënimeve të opozitës për të mos njohur votimin, procesi ka vijuar normalisht.
Ndërsa “Reuters”, duke iu referuar thirrjeve të vendeve ndërkombëtare për të shmangur dhunën, thotë se votimi në zgjedhjet lokale, të bojkotuara nga partitë e opozitës, vijoi me qetësi mes pjesëmarrjes së ulët.
“Pasi vendet perëndimore paralajmëruan dhe bën thirrje kundër dhunës, ndonëse disa protestues përdorën këngë dhe slogane nga e kaluara komuniste”, thekson “Reuters”.
Sipas Komisionit Qendror të Zgjedhjeve në të gjithë territorin e Shqipërisë më 30 qershor votuan 771 863 qytetarë apo 21.6%. /Opinion.al
