Në zgjedhjet e 11 Majit një pjesë e kandidatëve për deputetë ishin në pjesën e mbyllur të listave. Pra mjaftonte vota për partinë dhe ata e sigurojnë vendin në parlament, gjithmonë duke pasur parasysh numrin e mandateve që subjekti fiton për qark.
Aktualisht, numërimi po shkon drejt përfundimit dhe kanë mbetur vetëm pak kuti pa u nxjerrë fletët e votimit.
Por në këtë artikull ne do të tregojmë, vetëm për qarqet ku ka mbaruar numërimi, emrat e të gjithë deputetëve që e kanë fituar karrigen në Kuvendin e Shqipërisë pasi kanë qenë pjesë e listave të mbyllura.
BERAT
Berati ka 7 mandate të cilat ndahen 5 për PS-në dhe 2 për PD-në. Nga lista e fiksuar kalojnë në parlament 2 emrat e parë në listat e partive.
Partia Socialiste: Ervin Demo dhe Enriketa Jaho
Partia Demokratike: Enno Bozdo dhe Zija Ismaili
DIBËR
Në qarkun e Dibrës luhej për 5 mandate dhe nga lista e fiksuar janë 2 kandidatë. PS ka fituar 3 në Dibër dhe PD-ja 2. Në këtë mënyrë mandat kanë siguruar për:
Partia Socialiste: Blendi Klosi dhe Alma Selami
Partia Demokratike: Xhelal Mziu dhe Denisa Vata
KORÇË
Në Qarkun e Korçës ka 10 mandate. Partitë nxjerrin nga listat e fiksuara 3 kandidatë. Ky qark ndahet 6 me 4 për Partinë Socialiste. Në këtë mënyrë, mandat kanë siguruar për:
Partia Socialiste: Niko Peleshi, Romina Kuko dhe Genti Lakollari
Partia Demokratike: Ivi Kaso, Ledina Alolli dhe Bledjon Nallbati
KUKËS
Qarku i Kukësit ka numrin më të ulët të mandateve për deputetë, vetëm 3. Aty ka fituar Partia Demokratike që merr 2 mandate dhe PS-ja që merr vetëm 1 mandat. Nga lista e fiksuar kalon vetëm 1 deputet. Në këtë mënyrë mandat kanë siguruar për:
Partia Demokratike: Flamur Hoxha
Partia Socialiste: Eduard Shalsi
LEZHË
Një tjetër qark që u ngjyros blu. Lezha numëron vetëm 7 mandate dhe nga lista e fiksuar kalojnë 2 deputetë. Në këtë qark PD fitoi 4 mandate dhe PS-ja, 3. Në parlament kanë kaluar:
Partia Demokratike: Agron Gjekmarkaj dhe Elda Hoti
Partia Socialiste: Ulsi Manja dhe Ermal Pacaj
VLORË
Vlora ka 12 mandate në total dhe nga lista e fiksuar kalojnë 4 kandidatë për deputetë. Partia Socialiste ka fituar 8 mandate aty, ndërsa Partia Demokratike 4. Sipas të dhënave, në parlament do të futen për:
Partia Socialiste: Bledi Çuçi, Zamira Sinaj, Erjona Ismaili dhe Pirro Vengu
Partia Demokratike: Bujar Leskaj, Vangjel Dule, Ina Zhupa dhe Atird Hoxha
Këto rezultate janë vetëm për pjesën e listave të mbyllura, ndërkohë që në këto qarqe po vijon numërimi për pjesën e listave të hapura./tvklan.al
