Nëse ëndërroni ende për tu bërë biznesmenë të tregtimit, shitjes së naftës apo ndërtimit , hiqni dorë!
Këto biznese tradicionale nuk kanë më të njejtën vlerë fitimi, e për rrjedhojë nuk do të kënaqnin pritshmëritë tuaja.
Në 100 sipërmarrjet më fitimet më të larta në vitin 2014 kryesojnë bankat dhe telekomunikacionet.
Shërbimet financiare kanë një kthim të kënaqshëm, por konkurrenca e fortë e vështirëson hyrjen.
Bizneset e reja të “call center” kanë rezultuar fitimprurëse deri tani, por duke u shtuar në numër ato po japin sinjalet e para të ngadalësimit të rritjes.
Bizneset e dhuruara (koncesionet) po ecin mirë, por ato po përqendrohen “me mik” në pak duar.
Tregtimi i energjisë ka hapësira të rritet, teksa sektori pritet të liberalizohet në vitet në vijim. HEC-et private, ndërsa ecën mirë dy vitet e fundit, u “goditën” nga vendimi i Entit Rregullator të Energjisë (ERE) për të ulur çmimin edhe me efekt prapaveprues për periudhën 2012-2014.
Në mënyrë ironike, pas aksionit që synonte t’i jepte fund marrëzisë së lojërave të fatit, sipërmarrjet e kësaj të fundit po rezultojnë mjaft fitimprurëse.
Ndërsa Bankers Petroleum rezulton me humbje të thella, nënkontraktorët e tij po deklarojnë norma fitimi marramendëse. Tregtia (me shumicë) dhe nafta “lodhen” shumë për pak fitime.
