Real Madridi nga “Parajsa” në “Ferr”, brenda tri ditësh. Pasi shijoi triumfin në “El Clasico”, ndaj Barcelonës, në “Camp Nou”, ndaj rivalit të vet më të madh, udhëtoi drejt Volfsburgut, për të luajtur çerekfinalen e parë të Ligës së Kampioneve.
Krejt papritur e në mënyrë të paparashikueshme, gjermanët fituan me rezultatin 20, duke ia bërë mjaft të vështirë kalimin në gjysmëfinale skuadrës së drejtuar nga Zidane.
Në fakt, pas “El Clasicos” adrenalina ishte në shkallën sipërore te “Los Blancos”, të cilët e shprehën në mënyra të ndryshme lumturinë që mundën Barcelonën.
Edhe mediat iberike, pro Realit të Madridit, nuk hezituan të ironizojnë me këtë rast, duke vënë në qendër Gerard Pique, mbrojtësin katalanas, që nuk le rast pa e bërë të njëjtën gjë ndaj “armiqve” në La Liga.
Por, fati, sidomos në futboll, me njërën dorë të pret dhe me tjetrën të hedh.
Këtë e kanë provuar madrilenët në pak ditë.
Humori dhe ironia ka shpërthyer edhe në rrjetet sociale, por katalanasja “Sport” përzgjedh si më të goditurën njërin “memes”, duke ua kthyer “reston” kryeqytetasve.
Fotoja duke festuar e lojtarëve të Realit në dhomat e zhveshjes, pas fitores në “El Clasico” është “pasuruar” me detaje të tjera, që janë montazh, por e bëjnë tejet therëse ironinë. Para tyre vendoset “maskoti” i Wolfsburgut, ndërsa më tej duket koka e Pique, sikur është në rolin e personit të bën këtë “fotoselfie”.
