Veshjet të cilat mbajnë simbolin shqiptar – shqiponjën dykrenore, janë bërë të famshme në Brazil. Këto rroba kanë filluar të pëlqehen edhe nga personalitetet e njohura në atë vend, siç është ish-sulmuesi i Milanit, Alexandro Pato, i cili ka publikuar në Instagram një fotografi me një bluzë të bardhë me shqiponjën në gjoks.
Disa nga komentuesit kanë reaguar menjëherë për të treguar se bëhet fjalë për simbolin shqiptar. Madje ka pasur të tillë që kanë shkruar se “Pato dëshiron të bëhet shqiptar”.
E vërteta është se shqiponja dykrenore e flamurit tonë kombëtar është simbol firmës së njohur të veshjeve në Brazil – “Cavalera”.
Nëse hapni faqen e internetit të kësaj kompanie do të shihni shqiponjën që është emblema bazë e tyre. Po ashtu, në të gjitha veshjet e kësaj firme dallohet simboli i shqiponjës, identike me atë të flamurit shqiptar.
Kjo kompani e ka një shpjegim për shqiptarët e interesuar për përdorimin e simbolit të tyre kombëtar: “Edhe pse kjo logo është shumë e ngjashme me flamurin shqiptar, shqiponja dykrenore gjendet në shumë flamuj të tjerë, si flamuri i Malit të Zi, flamuri shtetëror i Serbisë, flamuri i Kishës Ortodokse Greke ose flamuri i shtetit autonom monastik Mount Athos. Origjina e kësaj shqiponje vjen nga Perandoria Bizantine dhe është e lidhur me religjionin, familjen perandorake, simbolet etj… Besojmë që kjo informatë do t’ju shërbejë të gjithëve, prandaj mos bëni shumë zhurmë rreth kësaj”, thuhet në sqarimin e stafit.
Kompania “Cavalera” është themeluar në vitet e nëntëdhjeta nga ish-bateristi i metal bendit “Sepultura”, Igor Graziano Cavalera.
