Gjykata e Lartë nuk liroi nga qelitë e paraburgimit Emiljano Shullazin, i dyshuar nga Prokuroria për Krimet e Rënda si autor i kryerjes së gjashtë veprave të rënda penale.
Një Kolegj Penal i kryesuar nga gjyqtari Shkëlzen Selimi nuk ka pranuar rekursin e bërë nga Shullazi për prishjen e vendimeve të dhëna më herët nga Shkalla e Parë dhe Apeli i Krimeve të Rënda për caktimin e masës së sigurisë “arrest në burg” ndaj tij. I dyshuari kundërshtoi vendimet e dy shkallëve më të ulëta me pretendimin se Prokuroria nuk kishte prova për veprat për të cilat ai dyshohej.
Rekursi i bërë nga Shullazi është mbyllur në dhomën e këshillimit më 2 qershor 2016, me “mospranim rekursi” dhe çështja nuk ka kaluar në shqyrtim në seancë gjyqësore. Kjo do të thotë që i dyshuari do të vijojë të hetohet nga Krimet e Rënda i izoluar në paraburgim.
I njëjti vendim është marrë nga Gjykata e Lartë edhe për të dyshuarin si bashkëpunëtor të tij, Blerim Shullazin. Po më 2 qershor, Kolegji Penal i kryesuar nga gjyqtari Guxim Zenelaj ka vendosur për mospranim të rekursit, duke lënë të pandryshuar në këtë formë masën “arrest në burg” për të.
Në lidhje me të dyshuarin e tretë të kësaj dosjeje penale, Gilmando Dani, ende nuk ka një vendim nga Gjykata e Lartë.
Rekursi i depozituar prej tij për tu liruar nga izolimi është në fazën e studimit në dhomën e këshillimit. Sipas Prokurorisë për Krimet e Rënda, tre të dyshuarit janë përfshirë në katër raste gjobëvënieje, përvetësim pasurie përmes dhunës ndaj zyrtarëve, presionit dhe kërcënimeve, si dhe kanosje për shkak të detyrës ndaj dy profesorëve Mynyr Koni dhe Dhori Kule.
