Agron Gjana është drejtuesi i Prokurorisë së Durrësit, të cilin ambasada amerikane nuk e pajisi me vizë hyrëse, duke i refuzuar kërkesën dhe duke mos e lejuar të udhëtonte drejt SHBA.
Pas refuzimit të vizës, ai ka qëndruar në Shqipëri, ndërsa pjesa tjetër e delegacionit kryesuar nga kryeprokurori Llalla ka vazhduar udhëtimin për në SHBA, sipas planifikimit.
Refuzimi i vizës për kryeprokurorin e Durrësit ka hapur debate, për shkak se vendimi vjen vetëm pak kohë pasi ambasadori Donald Lu deklaroi se SHBA ka anuluar vizat për një numër gjyqtarësh e prokurorësh të përfolur në Shqipëri.
Ai eshte emëruar në drejtimin e Prokurorisë së Durrësit me urdhër të kryeprokurorit Adriatik Llalla, në datën 7 maj të vitit 2015.
Propozimi i bërë nga prokurori i Përgjithshëm ka marrë fuqi pasi është dekretuar nga Presidenti i Republikës, që ka miratuar transferimin e
Gjanës drejtues në Prokurorinë e Durrësit.
Normalisht, çdo proces emërimi apo transferimi në Prokurori në nivele drejtuese shoqërohet me një fazë verifikimi si nga prokurori i
Përgjithshëm, ashtu edhe nga Presidenti që ka të drejtë të kërkojë informacion për emrin e propozuar në Polici, SHISH, gjykata dhe kudo
tjetër.
Më herët, po me urdhër të kryeprokurorit Llalla, prokurori Agron Gjana nga Kukësi ka drejtuar Prokurorinë e Krujës për një periudhë më tepër se njëvjeçare, para se të merrte drejtimin e Prokurorisë së Durrësit ku është drejtues aktualisht.
Burime nga Prokuroria kanë thënë se Gjana nuk ka qenë në punë të martën dhe të mërkurën, ndërsa delegacioni i prokurorëve që kanë
shkuar në SHBA është nisur ditën e diel.
