Deputetja e PD-së Jorida Tabaku, në fjalën e saj nga foltorja e Kuvendit, tha se e vetmja pengesë e anëtarësimit të Shqipërisë në Bashkimin Evropian, është mungesa e vullnetit politik të forcës në pushtet.
Ajo nënvizoi nevojën e diskutimit mes palëve për zgjedhjet parlamentare të 11 majit.
“Duhet një alternativë dhe ofertë ndryshe, që e sigurt nuk do vijë as sot, kur shpresa që qytetarët prisnin nuk duket as te kolegët socialistë në këtë sallë, e as jashtë salle. Uroj të kemi një diskutim për raportin dhe në shtator të kemi një rezolutë, ku elementi i parë të jenë zgjedhjet, si një shqetësim që sot pengon rrugën evropiane të Shqipërisë. Nuk ka pengesë më të madhe se qeveria, mungesa e vullnetit politik!”
Ndërkohë, ministri Balla, tha se në raportin që Tabaku i referohet Shqipëria është e para në mesin e atyre shteteve që synojnë të anëtarësohen.
“Ka një garë të paepur mes kolegëve të opozitës për ta nxirë Shqipërinë sa më shumë. Dëgjova edhe kolegen parafolëse që me shumë pathos tha se Shqipëria është e fundit këtu, atje, andej matanë. Madje i referohet një raporti vjetor të PE-së, i propozuar nga një mik shumë i mirë i Shqipërisë. Po është mik pa parti…Tha se Shqipëria mund të quhet padyshim vendi udhëheqës mes atyre që vrapojnë për t’u bërë anëtar i BE-së.”
Për debatin për zgjedhjet, Balla tha se ai proces ka përfunduar dhe se kërkesat për rinumërim po shqyrtohen nga institucionet kompetente.
“Debatin për zgjedhjet, po e bëjnë institucionet që kanë për detyrë të administrojnë zgjedhjet. Edhe të drejtën për të kërkuar rinumërim, që e dini mirë që nuk del asgjë te rezultati i përgjithshëm. Është ndonjë votë
tek-tuk…Ne nuk mund të bëjmë një debat për zgjedhjet tani! Ne nuk kërkojmë dorëheqjen e Saliut, ne jo njëherë! Me rëndësi është që kur vini këtu, kërkoni debat pa sens për zgjedhjet. Zgjedhjet u zhvilluan më 11 maj, rezultati është më i qartë se asnjëherë tjetër.”
