Kryendeshja mes Partizanit dhe Skënderbeut që u zhvillua dje në Tiranë nuk kishte histori vetem në fushë, por edhe jashtë saj në shkallët e stadiumit.
Gëzim Krasniqi i pezulluar ndoqi ndeshjen në tribunën VIP së bashku me Sukajn, ndërsa Labinot Ibrahimi mes tifozëve.
Raçiç feston golin, duke bërë një “selfie” me shokët e skuadrës në pistën e stadiumit. Një kopjim i Totit.
Në përfundim të pjesës së parë të takimit, presidenti i Partizanit, Gazmend Demi, ka shkuar në dhomat e zhveshjes dhe ka komplimentuar futbollistët për lojën që po bënin.
Në tribunën e medias, nuk ka munguar edhe prania e femrave. Gazetarja Dasara Karaiskaj dhe këngëtarja Çiljeta Xhilaga ishin në mbështetje të të kuqve. Madje, në fund Xhilaga i ka kërkuar fanellën portierit të Partizanit, Alban Hoxha, por ky i fundit i është përgjigjur se do t’ia jepte herën tjetër.
Pas ndeshjes, disa prej futbollistëve të Partizanit, si Trashi, Vila, Hoxha, por edhe Batha në momentin e konferencës për shtyp nuk i kanë përmbajtur lotët për barazimin e marrë.
Në mbyllje të takimit, në rast se Partizani do të fitonte, ishte planifikuar që në sfond të vihej kënga e Ermal Mamaqit: “Mos harro të vish ditën e verës”, sipas gazetës panorama sport.
