Gjykata Kushtetuese pranoi pjesërisht kërkesën e Onejda Ymerit duke thënë se i është cënuar e drejta me sekuestrimin e telefonit nga SPAK.
Telefoni iu sekuestrua nga hetuesit e Byrosë Kombëtare të Hetimit dhe më pas u konfirmua nga Gjykata e Posaçme.
Sipas Kushtetueses, kur sekuestrohet telefoni, rrjedhimisht ke fituar akses në korrespondecë, fshehtësia e të cilës është e mbrojtur me Kushtetutë.
Sipas vendimit të Gjykatës Kushtetuese, hetuesit mund të sekuestrojnë telefonin, por hapja dhe leximi i korrespondencës duhet të bëhet me autorizim të gjykatës, duke fokusuar kërkimin në lidhje me hetimin.
Pajisja e sekuestruar deri në autorizimin e Gjykatës ndalohet veprimi i hapjes, nxjerrjes dhe inspektimit të të dhënave, si edhe pajisja duhet të mbahet e mbyllur me vulë sigurie.
Në vendim thuhet se SPAK duhet të fshijë kopjet e korrespondencës që nuk kanë lidhje me hetimin, në kuadër të të cilit i është sekuestruar celulari.
