Trajneri italian, Antonio Konte, ka marrë një lajm të mirë nga stafi mjekësor para ndeshjes me Gjermaninë, e cila do të luhet ditën e shtunë në orën 21:00.
Konte ka thënë për mediat se mesfushori Daniele de Rosi do të jetë në fushë ndaj gjermanëve, pasi e ka lënë pas dëmtimin.
“De Rosi do të jetë në 120%-shin e formës së tij nesër. Jam i bindur që do të jetë i gatshëm”, deklaroi Konte.
Ndërkohë trajneri i axurrëve ka vlerësuar në maksimum kundërshtarin duke thënë se Gjermania është aktualisht skuadra më e fortë në botë dhe se italianët do ta kenë shumë të vështirë fitoren.
“Do të jetë një ndeshje shumë e vështirë. Gjermania është një kundërshtar i fortë, një ekip më i fortë se Spanja. Është një skuadër e kompletuar, por të shohim se çfarë do të ndodh në fushë”, shtoi Konte.
