Alvaro Morata në një intervistë për stacionin televiziv spanjoll “Cuatro”, gjatë kohës së drekës së të shtunës, teksa komentonte atmosferën në kampin spanjoll vetëm pak kohë para ndeshjes me Italinë në fazën e 1/8 të Europianit, ka zbuluar një sërë detajesh. Sulmuesi spanjoll ka folur për episodet e çuditshme të Pique, sikurse për humbjen ndaj Kroacisë, për golat e realizuar, por në veçanti edhe për një bisedë që ka bërë paraprakisht me shokët e tij të skuadrës te Juventusi, që luajnë me Italinë.
“Nëse do të mund të vendosnit një kamera në hotel, atëherë do të shihnit se çfarë atmosfere e mirë po përjetojmë. Gjatë seancave stërvitore jemi disi të tërhequr, për shkak të kamerave të shumta që ka për rreth. Kur gjërat ecin mirë, nuk duhet të godisni varkën. Ka gjëra për të cilat ne qeshim, numri i gjërave të pavërteta që thuhen, apo dhe shakave. Ne gjithmonë qeshim me gjërat që bën Pique. Ai bën gjithmonë gjëra të tilla, nuk është një problem. Është një anekdotë, nëse jemi të bashkuar, atëherë do të jemi më të rrezikshëm”, përshkroi Alvaro Morata atmosferën në kampin spanjoll.
“Ndjehem mirë dhe për mua, të qënëit këtu është e mrekullueshme. Unë do të shkoja në Colon (Madrid) me miqtë e mi, kur Spanja fitoi dhe tani ja ku jemi këtu. Është një turne i gjatë dhe ajo që ndodhi ndaj Kroacisë mund të ndodhë në futboll. Rivaliteti nuk prish punë, ne jemi aty ku duam të jemi. Goli i parë ishte shumë i rëndësishëm dhe kuptimplotë për mua. Ishte goli i parë për mua dhe më nevojitej. Golat e tjerë shkojnë për shokët e ekipit”, u shpreh bomberi i Spanjës në Europian.
“Kam komunikuar me mbrojtësit e Juventusit që luajnë me Italinë dhe më thanë se nëse do të luaja, duhej të mbaja një helmet në kokë. Ata janë arsyeja e suksesit te Juventusi në sezonet e fundit. Mënyra se si ata luajnë është karakteristike e Italisë, por ne duhet të fokusohemi te loja jonë”, tregoi sulmuesi spanjoll.
“Për mua David De Gea është në formë të mirë, si gjithmonë. Është një moment i vështirë për atë, por ne e kemi inkurajuar dhe ai është një prej portierëve më të mirë në qarkullim. Ndeshja me kroacinë tashmë është hedhur pas shpine. Ne mund ta kishim fituar, por nuk po jetojmë në të kaluarën. Nëse dëshiron të fitosh Europianin, duhet t’i fitosh të gjitha ndeshjet, pavarësisht se kundër kujt ndeshesh”, përfundoi Morata.
