Dy anije të klasit “Vedeta 2000” i janë bashkuar flotës detare shqiptare, më konkretisht të Policisë së Shtetit, mundësuar nga Guardia di Finanza dhe Misioni Interforza.
“Një moment i rëndësishëm për forcimin e sigurisë sonë detare, që vjen si rezultat i një pune të nisur prej korrikut të vitit të shkuar nën drejtimin e dy kryeministrave, Edi Rama dhe Giorgia Meloni, si dhe një ekipi të përbashkët të përbërë nga Ministria e Infrastrukturës dhe Energjisë, Ministria e Mbrojtjes dhe Ministria e Brendshme, së bashku me partnerët tanë në bregun tjetër të Adriatikut, ministrat Salvini, Piantedosi dhe Crosetto”, njoftoi ministri i Mbrojtjes, Pirro Vengu.
Sipas tij ky bashkëpunim mundësoi dakordësinë për një protokoll të rritjes së kapaciteteve për Policinë e Shtetit dhe Forcat e Armatosura Shqiptare. Vlerësim maksimal po merr bashkëpunimi edhe mes Guardia Costiera-s, Rojes Bregdetare, Policisë Kufitare dhe institucioneve të tjera ligjzbatuese në vend.
“Së bashku me Zëvendësministrin e Brendshëm, Julian Hodaj dhe Drejtorin e Përgjithshëm të Policisë së Shtetit, Ilir Proda, ishim të pranishëm në ceremoninë e dorëzimit të mjeteve lundruese, një dëshmi e qartë e marrëdhënies së shkëlqyer dhe mbështetjes së vazhdueshme që Shqipëria ka marrë nga partnerët tanë ndërkombëtarë, e në këtë rast nga Italia, e cila garanton angazhimin e përbashkët për forcimin e sigurisë kufitare dhe luftën kundër trafiqeve dhe kontrabandës që mund të kryhen përmes hapësirës detare. Falënderim i veçantë për miqtë tanë italianë dhe të pranishmit në ceremoninë e dorëzimit të mjeteve, Ambasadorin e Italisë në Shqipëri, Marco Alberti, Komandantin e Përgjithshëm të Guardia di Finanza, Gjeneralin Andrea De Gennaro, dhe Drejtorin e Emigracionit në Policinë Kufitare, Prefektin Claudio Galzerano”, tha Vengu.
